أنت القصيدة
✍🏻/ علي الخبراني :
مدري اذا حظي مع الزين مقطوع
أو يعتمد يرسـل بوقت إنقطاعـي
شهرين غايب وانقطع كل مسموع
ما عاد للجوال فـي الڪف داعـي
غايب أنا مـن بعد غيبتك موجـوع
خايف من الشاشة تزيـد إلتياعـي
يا مهجتي بعض الزعل حق مشروع
والبوح بعض أحيان للهجر ساعـي
لڪن إذا شِـعري مـع الغير مصنوع
وقتي معك عن كل حرفـي الصناعي
أنت القصيدة والمشاعر وموضوع
قصَّـة غـرامـي والعـِلاج المناعـي
بسـتان صـدري ما نبت فيه مزروع
قبلك ولا بـعـدك بـيـرجـع زراعـي
والقلب يا قلبـي مـن الغيد ممنوع
في حضرتك ناسي أڪون إجتماعي
أعلنت حُـبِّـك داخـل القلب ينبوع
يسقـي عروقـي والعيون ويراعـي
في بحر حبك قارب الشوق مدفوع
القلب قـايـد والصـبابـة شـراعـي
إسمك ودادي داخل النون مطبوع
لا يشغلك بعض الحديث الإشاعي
دمعـة عيونك تترك القلب مشلوع
والحزن في صوتك يزيد إنشلاعـي
وختامها ڪل الخطا منك مبلوع
غير الزعل والهجر من غير داعـي
