البوم صور …
منى البابوري / تونس
كي نتوحش العزاز علي
و يجاو على بالي الغاليين
نتفكر برشا حكايات
و يقتلني حس الحنين
عندي حاجة في تركينة
مخبيتها عندي سنين
البوم صور نجيبو
و نبدا نقلب يسار و يمين
هذوما تصاور الغاليين
و الي في البال قاعدين
فيهم الي فارقونا
و الي مزالوا حيين
هذا عزيز علينا مشى
خلى دمعة في العينين
خلى وجيعة وسط القلب
و اهات ما ادويها سنين
و هذي تصاور ناس معانا
كي كانوا صغار محلاهم
هذي صورة الخطوة الاولى
و هذي كي طلعو السنين
و هذي صورة نموت عليها
كيف ما انا بنت فيها
نضحك فرحانة بروحي
تقول علي جيت منين 
قالولي كنت محلاك
بالصحة و مليانة بالزين
قلت يا ريت هالايامات
يرجعو حتى نهارين
ضحكة و دمعة هي الدنيا
و لازم نقبلوهم لثنين
مرة هكا و مرة هكا
حتى يوفاو هالسنين
و يبقى البوم الصور
فيه احلى الذكريات
ناس وفا بيها العمر
و ناس في طريقهم ماشين
