الايام صدت
دحو منصور مهدي _ تيارت / الجزائر
اكبرنا ياصاحبي صدت ليام
ماهي ظنة كان ترجع كي بكري
كان الصغر مع الصحة زوج توام
اتفرقو لثين ونساوه صغري
متأمل فيها الدنيا عام بعام
غدارة وأيامها فاتت تجري
الشيب غزانا عاد ف اللحية سوام
قال لها بيعي السواد انا نشري
دار الحال خلاص مابقيش كلام
ظهرت علامة ادل على كبري
وش نجحد اصاحبي والكذب حرام
كل ساعة فيها ينادي لي قبري
ياهل ترى واش نلقاو القدام
مانعرف ماراه داهم ماندري
ليلة ليلة و المحاين بالعرام
وحدي في للحاد تتضايق عمري
ضيمي على رسولنا خير الانام
يحضر لي راني مزودها بكري
الدنيا محال لامن فيها دام
ساكن دار الفانية شغل تكري
معناها كي شغل راقد شفت منام
ضلمة دامس ماتشوف إذا تسري
واطلبتك ياخالقي محي العظام
اغفر ليا الخافية ولي جهري
راني خايف يالله يوم الزحام
يوم تكون الخلق فالضيق وحشري
انا عبد ضعيف منيشي قوام
نترجى في رحمتك تجبر كسري
الشاعر منصور دحو جاب كلام
ينصح بيه فطين خواف وحذري
ام الجاهل راه تايه في الظلام
نفسو لعبت بيه وبليس يهوري
نختمها بصلاة ونزيد السلام
على خير الانام يانور البدري
محمد والآل واصحبو بكمال
فازو فالدارين صلاة وذكري
