منزل صقر (البريمي)

✍️ سمير الشحيمي :

العصريه سلمى مجهزه السويت والشاي والقهوه ويدق جرس البيت تفتح حسناء الباب الجارات في زيارة لسلمى تدخل فاطمة وهند إلى الصاله.
سلمى : نورتوا هلا وغلا كيفكن شو اخباركن؟
فاطمة : الحمدلله بخير طاب حالك أنتي شحالك حمدالله على السلامه.
سلمى: الله يسلمك بخير لله الحمد.
هند : هلا بيك سلمى زمان ماجيتك.
سلمى : أيوه كله نحن نمر عليك أنتي ما طلعي صوبنا.
هند : تعرفي مشاغل الحياة والعيال.
سلمى: الله يعطيك العافيه.
هند : الله يعافيك.
فاطمة : كيف كانت صلاله؟
سلمى : ولا أروع سبحان ربي على ذيك الأجواء الربانيه.
فاطمة : شوقتيني خبرت أبو العيال يوديني قريب إن شاء الله.
سلمى : ماغلط حبيبتي روحي استانسي.
هند: شو جبتي لنا من صلاله ولا ما ذكرتينى بشي.
سلمى : مايصير انساكم وانتوا جيراني جبت البخور واللبان والعطور والحاجات اللي راح تعجبكم.
هند : فديتك والله تمدي بزود حبيبتي.
شوي طلع صقر من غرفته وسلم على اللي بالصاله وخرج خارج المنزل.
فاطمة : بشريني كيف الخدامه سيام وياك؟
سلمى : والله إنها راعية بيت ماتقصر تشتغل من خاطرها تعرفي لو معاي فلوس كنت كفلتها وخليتها معاي بالبيت.
هند : شغلها وايد زين بس تثرثر واايد ماتسكت.
فاطمة : صح تحب تتكلم وايد.
سلمى : خبريني هند شو صار مع زوجك كشفتي عنه شي إذا متزوج أو لا؟
هند وفاطمة يضحكن استغربت سلمى: شو فيكم تضحكون قلت شي يضحك.
فاطمة : سمعي شو صار ظلمنى الريال.
هند : طلعت الهديه حقي بمناسبه عيد زواجنا تخيلي وأنا كنت ناسيه وهو متذكر.
سلمى : صدق والله حليله ظلمناه.
هند : شفتي كيف وهاي الساعه شو رأيك فيها؟
سلمى : وايد حلوه متهنيه.
فاطمة : ذوقه حلو.
سلمى : اكيد تستاهل هند مدن أيدكن تفضلن الفواله بسم الله.

منزل صقر
غرفة شيهانه ومع حسناء يصفطن ملابسهن بالكبت.
شيهانه: حسناء ليش ماجلستي مع أمي تضيفي الحريم معها؟
حسناء : وأنتي ليش ماتسيري بدل عني.
شيهانه: شوفت عينك أرتب ملابسي.
حسناء : وأنا نفسك بعدين أنا قلت لأمي بسير داخل قالت برايك.
شيهانه: زين تعرفي أنا اتملل من فاطمة جارتنا ياربي تسولف واايد اتصدع من صوتها.
حسناء : صدقتي والله صوتها مزعج نفس العنزه بس ماعرف كيف اوصف الصوت.
شيهانه تقلد صوت فاطمة تضحك حسناء وتأشر بيدها : أيوه صح كذا صوتها جبتيها صح تضحك شيهانه من ضحك حسناء.

الصالة الرياضية رجال
باشق يتمرن بجهاز المشي وشاهين جنبه يستخدم الدراجه الثابته وحاط سمعات بإذنه.
باشق : أقولك شاهين.
شاهين ما يسمعه صوت الأغاني عالي بإذنه.
باشق يرمي عليه علبة ماي فارغه انتبه له شاهين: ها شوفيك.
باشق : أكلمك ماتسمعني.
شاهين : أسمع أغاني.
باشق : أقولك محصل بيعه لسيارتي شو رايك.
شاهين : أحسن بيعها بس شو راح تاخذ غيرها السوق غالي من اللحين أخبرك.
باشق : شو دراك ؟
شاهين : زميلي منير يبي يشتري سياره ويدور مامحصل السوق غالي.
باشق : يعني انتظر.
شاهين : احسنلك تنتظر لين تشتغل بعدين شوفلك أي سياره من تستلم المعاش.
باشق : شورك طيب.
يرجع شاهين لسماعته واغانيه.

المقهى
صقر ومع أصدقاءه يشربون القهوة والشاي وسوالف عن أمور الدنيا.
صقر : تعرفون إن سفرة صلاله جميله بس محتاجه ميزانيه وربي كل شي غالي من سكن أكل.
أبو سلطان: صدقت من قريب نسيبي يبي يسير وحصل غالي الحجوزات كنسل.
أبو تركي : أنا بسير هناك عندي أختي متزوجه بصلالة والسكن موجود لله الحمد.
صقر : هيه نعم طاح نص الهم دام حد عنده سكن الباقي يهون من أكل ومواصلات أما السكن هو أهم شي.
أبو سلطان: مافي عن تايلاند كل شي رخيص فيها.
أبو تركي يضحك: شكلك تذكرت ايام بوكيت.
أبو سلطان: لا تذكرني الغالي.
يضحك الجميع.

شقة رحمه (العاصمة )
رحمه بالصاله جالسه أتابع تلفزيون وبيدها موبايلها والعيال يلعبون ترسل مسج لصقر يشوفها ومايرد عليها تركت هاتفها ودخلت مطبخ تسوي لها نسكافيه قالت لها الخدامه: اسويلك مدام.
رحمه : لا أنا بروحي بسوي أنتي خلصي شغلك.
انتهت من تحضير النسكافيه وتوجهت إلى مكانها وجلست رن هاتفها دق قلبها بقوه رأت من المتصل كانت أمها خاب ظنها توقعت صقر متصل.
رحمه : ألو هلا أمي.
زينب : هلا بنتي حبيبتي اخبارك؟
رحمه : الحمدلله بخير أنتي اخبارك وأخبار أبوي.
زينب : الحمدلله تمام كلنا بخير محد شافك من كم يوم.
رحمه : تعرفي من البيت لين العمل وارجع البيت ما أسير مكان.
زينب : تعالي البيت وهاتي معاك العيال نتونس مع بعض.
رحمه : لا ما عليه مالي خاطر.
زينب : تعالي تعالي خلي عنك إخوانك بعد جايين ومعاهم أعيالهم تعالي بينقص وجودك.
رحمه : ماعرف شو أقولك.
زينب : بصكر عنك ومعاك ساعه ونص احصلك جدامي تمام.
رحمه : اوك تمام تبي شي وأنا جايه صوبكم.
زينب : كل شي موجود بس تعالي أنتي والعيال ننتظرك.
رحمه : تمام.
أغلقت الخط أشرت على الخدامه تجهز عشان تروح بيت اهلها.

يتبع….