العاصمة

✍️ سمير الشحيمي :

توزيع الشهادات على المشاركين في الدورة التدريبيه بالمؤسسة الأستاذه رحمه تسلم صقر الشهادة وقالت له : أتمنى أنك ما تضايقت لما كلمت مديرك الأستاذ محمد.
صقر : الكذب خيبه أكيد تضايقت بس اعتبري السالفه طاحت من استلمت الشهاده.
رحمه : أهم شي ومشكور على مشاركتك.
صقر : العفو.
رحمه للحضور : أشكر الجميع على مشاركتهم والسموحه إذا بدر مني أي سوء أو خطأ غير مقصود واتمنالكم عودة آمنه إلى منازلكم واللحين تفضلوا بوفيه الغدا جاهز.

منزل صقر
سلمى حطت الغداء وحسناء وجراح وعنقاء يتغدون وقالت سلمى : حسناء العصر بسير ازور بيت الجيران أبيك اديري بالك على الصغاريه.
حسناء : مب مشكله الوالدة بس عندي طلبية ورق عنب حق باكر أريد أجهز مكوناتها.
سلمى : حق من؟
حسناء : زميلاتي بالمدرسه عجبهن الورق العنب اللي أسويه وطلبن كم صحن وأكيد مب بلاش.
سلمى : ما شاء الله عليك زين زين بناتي صايرات تاجرات انتي اتاجري بلأكل واختك شيهانه بالفساتين.
حسناء : حلو الواحد يستغل موهبته ويترزق منها.
سلمى : أكيد حبيبتي بس أهم شي دراستك الأسبوع الجاي تبدء امتحانات الفصل الأخير لهاي السنه.
حسناء : لا تحاتي أمي مجهزه كل أموري.
سلمى : الله يوفقك حبيبتي.

صقر بالسياره وهو متجه بالخط السريع الى البريمي يرن هاتفه الجوال رحمه متصله : هلا صقر وينك؟
صقر : بعد وين بالخط رايح البريمي.
رحمه : وليش إن شاء الله؟
صقر : شو اللي ليش أنا راجع بيتي مع أعيالي.
رحمه : وأنا هنيه شو مب من عائلتك أنا زوجتك إذا أنت ناسي.
صقر : لاحول ولا قوة والله أدري بس خلاص خلصت الدورة التدريبيه ولازم أرجع.
رحمه : في اجازه الأسبوعية كان رحت البريمي مساء السبت مب شرط من خلصت الدوام شردت.
صقر : رحمه خلاص راح اعوضك الأيام الجايه.
رحمه : هيه صح لين يبيض الديك يالله باي.
صكرت الخط قال صقر : شو اللي بلاني هاي البلوه.

غرفة منير
شاهين جالس مع منير يدرس قال شاهين وهو ياخذ قسط من الراحة: تصدق منير مرات أفكر أسوي مثلك آخذ غرفة برا وأسكن بروحي بعيد عن صدعة البيت والأهل.
منير : هو زين بس للأسف راح تمل كثير وتفقد أهلك وبتشتاقلهم.
شاهين : ترا ماراح أكون بعيد يعني وقت أريد أنام أريد أجلس مع نفسي أجلس بهاي الغرفة عزلة بصريح العباره.
منير : إذا كذيه ممكن بس انك تسكن بروحك على طول صعبه أنا أدرس هنا بالبريمي وأهلي بالداخليه مسافه بعيده ماتشوف حد ولا حد يشوفك طبعاً فوق هذا لقمتك مامتوفره كله على المطاعم ماتلاقي حد تسولف معاه أتمنى أخلص بسرعه عشان أرجع البيت.
شاهين : ياربي لهاي الدرجه.
منير : وأكثر ياخوي جرب وبتعرف.
شاهين يفكر بكلام منير.

منزل صقر
نزل الليل والكل بغرفته وصقر رجع من العاصمه وجالس مع زوجته سلمى وقال لها : تصدقي مافي أحسن من لمة الأهل والعيال.
سلمى : شكلك تمللت بروحك.
صقر : وايد.
سلمى : وايد وايد؟
صقر : وايد وايد.
وتضحك سلمى.

يتبع…