منزل صقر

✍️ سمير الشحيمي :

شاهين ياخذ شنطة ملابس أبوه صقر ويحطها بحقيبة السياره وصقر وعائلته عند باب البيت قالت سلمى: يعني لو طالع الصبح بدل السفر بهالليل مب أحسن حقك.
صقر : تعرفيني أحب سواقة الليل اهدء ومافي سيارات كثيره وربشه وبعدين هاي العاصمة ما بعيده ثلاث ساعات.
سلمى : دير بالك.
شيهانه : بنشتاقلك أبوي.
صقر : وأنا بعد بشتاقلكم، باشق وشاهين ديروا بالكم على البيت وأمكم وخواتكم وعن السهر لوقت متأخر برا البيت.
باشق : أن شاء الله أبويه.
جراح وعنقاء يحضنون أبوهم ويتحرك صقر بسيارته مغادر البريمي بتجاه العاصمة.

الكلية بالصباح الباكر  نادره تراجع بعض الدروس بكتاب بين يديها وتجلس معاها شيهانه وقالت لها : شو جالسه تسوي  . 

نادره : أراجع آخر محاضره عطانى إياها الماستر لأن بيسألنا عدة اسئله وحابه أكون مستعدة.
شيهانه : أنا راجعت بالبيت طول الليل وجاهزه حق أسئلة الماستر  . 

نادره يرن هاتفها ترد على المكالمه مع أبوها بعدها صكرة وقالت لشيهانه: هذا أبويه يقول إنه ماراح يقدر يرجعني البيت فإذا وحده من صديقاتي ترجعني بطريقها أو يرسلي تكسي لأن إخواني ولا واحد منهم بالبريمي.
شيهانه : راح اوصلك لا تحاتي ماله داعي لتكسي خبري أبوك.
نادره : تمام بخبره.

العاصمة 
يدخل صقر إلى مقر المؤسسه بالعاصمه ويذهب مباشرة إلى مكتب الشؤون الإدارية صقر يتحدث : السلام عليكم ورحمه.
الموظفين : عليكم السلام ورحمه تفضل أخوي بشو نخدمك؟
صقر : أنا أسمي صقر موظف معاكم جاي من البريمي عشان دورة تدريبيه فقالوا حقي اجي هنا وأسأل عن الأستاذة رحمه.
أحد الموظفين : حياك الله أخوي صقر نعم الاستاذه رحمه هيه مديرة قسم شؤون الموظفين بنفس الوقت هيه اللي تعطي الدورة التدريبيه، كل إللي عليك تروح بالممر من جهة اليمين آخر الممر يسار ثاني مكتب على إيدك اليسار هناك قاعة الإجتماعات اللي بتقام فيها الدورة التدريبيه.
صقر : أشكرك أخوي.
يغادر صقر متجه للقاعه التي سيقام بها الدورة التدريبيه.

منزل صقر
سلمى بالمطبخ تجهز وجبة الغداء صوت جرس البيت تغسل أيدها وتلبس شيلتها وتطلع تفتح الباب إنها جارتها فاطمة وبرفقتها إمرأة آسيويه قالت فاطمة : هلا والله سلمى أخبارك هاي اللي خبرتك عنها.
سلمى : مرحبا فاطمة هاي هيه ما شاء الله شو اسمك؟
المرأة : سيام.
سلمى : سيام تعرفي تنظفي اطبخي تغسلي؟
سيام : كله معلوم مدام.
فاطمة : لا تحاتيها راعية بيت دوم تجي تساعدني.
سلمى : كم تاخذي فلوس؟ الشغل اللي معاي على حسب تنظفي البيت والحوش وتغسلي ملابس وإذا في شي بالمطبخ بتساعدي فيه مثل تقطيع بصل وغيره مب دايما مرات.
سيام : معلوم شغل مدام واحد شهر 55 ريال
سلمى : وايد خفي علينا شوي تبي صقر ينعش فيني.
سيام : شغل وايد مدام كل يوم ثلاث ساعات يجي شغل داخل بيت.
فاطمة : خفي على الحرمة تكفيك 30 ريال.
سيام : لالا شغل وايد آخر 50
سلمى : أقولك تكفيك 40 ريال إذا ناسبك قولي.
سيام : شغل وايد مدام مايكفي.
سلمى : جربي شغل البيت قبل بعدين شوفي كيف الأمور أنا بساعدك ماراح تشتغلي بروحك.
سيام : خلاص مدام 40 ريال.
سلمى : تعالي دخلي ، فاطمة تعالي بتتقهوي معاي؟
فاطمة : لا خليني رايحه بيت صفاء شوي اجيك وقت ثاني مع السلامة سلمتك الخدامه حياك الله.

العاصمة
تحديداً بالمؤسسة يدق صقر باب القاعة ويدخل ويحصل الموظفين متواجدين وتترئسهم سيدة متوسطة العمر جميله لا تضع الكثير من المكياج مرتديه العبائه السوداء زادتها بهاء وجمال فقالت : تفضل بشو نقدر نخدمك؟
صقر يحمحم : أنا صقر جاي من البريمي بخصوص الدورة وقالوا لي أن الأستاذة رحمه بتكون موجوده هنيه.
المرأة تنظر لساعتها وقالت : أيوه الأخ صقر خبرني عنك مديرك بس متأخر بالحضور؟
صقر : زحمة الشوارع أنا آسف.
رحمه : تفضل خذ مكانك لو تسمح.
دخل صقر وجلس بأقرب كرسي فارغ فأكملت رحمه حديثها له : مره ثانيه أحسب حسابك لازم تكون هنيه على الموعد لو تسمح.
صقر : أن شاء الله أستاذه.
رحمه : نرجع لحديثنا أيها الأفاضل.
واكملت رحمه حديثها.

خارج الكلية
شاهين يسوق السيارة وبجانبه أخته شيهانه ونادره بالخلف قالت شيهانه : جوعانه ماعرف شو طابخه أمي على الغدا.
لا جواب ناظرت شيهانه على شاهين كان مشغول بالنظر للمرايه ويتبادل نظرات مع نادره فقالت شيهانه: يا صبي شوف طريقك خلي عنك هاي الحركات.
شاهين : اي حركات خليك بحالك أنتي بس.
شيهانه : ماشي فايدة لازم أخبر أبوي.
شاهين : أعوذ بالله منك أنتي مب أخت عدوه.
ضحكت نادره.

يتبع….