عائلة صقر

✍️ سمير الشحيمي :

                    ” منزل صقر” 
طلعت شمس الصباح يستعد صقر الذهاب إلى عمله ، سلمى جهزت الريوق نزل باشق ومعه شاهين وشيهانه يتناولون وجبة الإفطار قال صقر : يا شاهين أجلس وكل نفس الناس.
شاهين : مستعيل أبويه تعرف الكلية لازم اللحق عليها متأخرين وأنتي شيهانه خلصي بسرعه.
سلمى : شوي شوي على أختك خليها تاكل.
شاهين : يا أمي بتأخر على محاضراتي.
شيهانه : خلاص أنت روح بيوصلني باشق بجي معاه.
باشق : لا أنا معاي ربعي ماراح أقدر أوصلك.
شيهانه : أبويه لازم تاخذلي سياره هاي مب حاله مع أعيالك ذالينا.
صقر : موضوع السياره بعدين بنتفاهم عليها وأنت شاهين أنتظر أختك شلها وياك.
شاهين : بس أبويه…
يقاطعه صقر وهو ينهض من مكانه : من دون بس وأنتي حركي نفسك لا تأخري أخوك.
سلمى : شو تبى على الغدا؟
صقر : اللي تسويه.
طلع صقر ولحقه ولده باشق وعند باب البيت قال باشق لأبوه: أبوي أبيك بموضوع.
صقر يفتح باب سيارته : يعطونك منحه 90 ريال وينهن؟
باشق يبتسم على فطانة صقر : تعرف مصاريف دراسه وبترول سياره ومحتاج مبلغ بطلع مع الشباب دبي بنهاية الويكند.
صقر : بشوف كيف الأمور برد عليك.
باشق : مشكور الوالد ماتقصر.
صقر : بس حط ببالك أنت آخر سنه بالجامعه أنتظرك تخلص عشان تساعدني بمصروف البيت وأخوانك يعني من الأخير ركز على دراستك وملحق على الأحواطه.
باشق :أن شاء الله أبوي.
صقر يتحرك إلى عمله.

الكلية
شاهين يدخل بسرعه إلى ممرات الكلية متجه إلى القاعه وشيهانه تضحك عليه وشاهين معصب دخل المحاضرة والدكتورة تسأله : شاهين متأخر كعادتك شو عذرك اليوم؟
شاهين : آسف مس السياره كان فيها مشكلة وبعسر حيله اشتغلت معي وجيت بسرعه.
الدكتورة : احسنلك تتخصص ميكانيك تصليح سيارات افضلك من انك تدرس نظم معلومات تفضل أدخل.
الجميع يبتسم مع حديث الدكتوره ودخل شاهين وجلس جنب زميله منير وقاله : اسميك بكل مره تتأخر بحصتها ماتوب.
شاهين : اسكت عني بروحي ما طايق نفسي.
منير يبتسم.

شيهانه في الكافيه بحرم الكلية وتجي صاحبتها نادره وتجلس جنبها وتقول : هلا حبيبتي شيهانه شو اخبارك؟
شيهانه : بخير لله الحمد انتي شو اخبارك؟
نادره : مره كول ، صح على فكرة أنا جهزت كل شي بخصوص لمة البنات.
شيهانه : نايس وأنا خبرت أمي وبغصب وافقت راح يكون ويكند وناسه.
دخلن ثلاث بنات الكافيه قالت نادره : ياربي شو في من جايه؟
شيهانه تلتفت وراها وقالت : أوف يا ربي هاي شو جابها هنيه اللي اعرفه طلع اسمها بكلية بالباطنة.
نادره : مادريتي هاي سوت تحويل لهاي الكلية وتعرفي أبوها واسطته قويه.
جاتهم البنت اللي يتكلمون عنها وقفت. هيه تبتسم بغرور وقالت : هاي بنات شحالكم حلو نجتمع كلنا بكلية وحده.
شيهانه : هلا فيك حبيبتي شيخه أكيد من الثانويه لين الكلية أحلى لمه أكيد.
شيخه : أكيد حبيبتي يالله أنا استأذن بسير أجلس مع القروب مالي.
نادره : باي.
رحلت شيخه وطالعتها شيهانه وقالت : ما تنبلع دمها ثقيل وبطرانه ( حلو نجتمع بكلية وحده) مالت أنا أقول.
نادره تضحك : خليك منها وخلينا نشرب قهوتنا ونسير بعد شوي تبدء محاضرتنا.

تتوقف سيارة سلمى عند باب بيتها وتنزل منها وصادفة جارتها فاطمة طالعه من بيتها وقالت لها : هلا فاطمة صبحك الله بالخير.
فاطمة : يسعد صباحك حبيبتي سلمى ما شاء الله من وين جايه؟
سلمى : وصلت الصغاريه المدرسه واللحين راجعه أنظف البيت وأجهز الغدا.
فاطمة : الله يعطيك العافيه حبيبتي الله يكون بعونك لو تجيبي خدامة تساعدك على الأقل بشغل البيت.
سلمى : أنتي صادقه بس أبو العيال ما طايع.
فاطمة : هذيلا همه الرجاجيل ما يعجبهم شي ، يبون الوحده تكرف تربي العيال تنظف تطبخ تغسل.
سلمى :خليها على الله حبيبتي ، وأنتي وين سايره؟
فاطمة : هنيه قلت أحرك رجولي بدل الجلسه.
سلمى : تمام الله يعطيك العافيه بخليك.
فاطمة : تمام حبيبتي ، صح لا تنسي اليوم العصر حريم الحاره بنسير أنزور جارتنا هند نتحمدلها بسلامة ولدها راجع من السفر.
سلمى : هيه صح خلاص معاكم إن شاء الله.
فاطمة : تمام بتواصل معاك مع السلامه.
دخلت سلمى البيت وكملت فاطمة طريقها.

المؤسسة.
صقر في مكتبه ومعه بالمكتب زميله سعيد قاله : المدير يبي المعامله تكون جاهزه يا أبو باشق.
صقر : خلاص جاهزه بتوصلها حقه؟
سعيد : لا بروحك وصلها حقه ما أحب أشوفه.
صقر : أنا طالب من الفراش يجيب شاي وأخاف أتأخر إذا رحت مكتب المدير وايد يتكلم ويسأل.
سعيد : أنت سير وصل المعامله واعطيها لسكرتير ورجع عنه.
صقر : صدقك نعم اللحين بسير.
ينهض صقر من مكانه وهو يتجه إلى خارج المكتب اصطدم بالفراش الذي أحضر الشاي وانسكب الشاي على ملابسه واتسخت.
تبادل نظرات بين صقر والفراش وسعيد يضحك.

يتبع….