” مازال نتعلم “
الشاعر بوالفلفل رابح / سكيكدة / الجزائر
فــايت الـخـمـسـيــن ومـــازال نتعلــم
اشحال من ادروس قاسيــة نـا عـدّيت
فــايــت الـخـمـسيــن ومــازال نتألــم
وانـا عظمـي قاسي وبالضـر حسيـت
فايـت الــخمسيــن وعمــري نستسلم
الـــدنيــــا دار الشقــــا لله اشكـيــت
اخذيت كم ادروس من عربان وعجم
كني مــا تعلمت مــن الصفـر ابديـت
اشحال اندرس اصعيب وباقي مبهـم
حتــى اليــومـنــا مازال مـــا حليـت
يـوم ذوقو اعـسـل يـوم ذوقـو علقــم
ولـمواقــف تكشــف اللي مـا ادريت
كــم مــن حيــات نفـثــت فيـا الســم
وكم من اكلاب عضوني كي اغفيت
حيــرني شي قوم شيــات ما يشحـم
دايـــر التحــلاب في بــالــو تشييـت
مايهــمــو قــــدرو تلقــاه غيـر زادم
مبــردع ســاجي اركب ايـذا انـويت
كي شــوف السلطان يشطح امحـزم
عاشــق الـذل مــن افعـالــو اتبريت
عايش في نص الرخس وكل امحرم
ويقول شفت وعرفت وريبت وبنيت
الله ايعــافينـا وكــل مومــن مسلــم
اتقــبــل ربي منـي دعــوة ادعيــت
الــرجلــة والايمــان خــاوة فالــدم
الرجال الشجعان الصادقين ا عنيت
كل مطلــع الـشمس يتحلــف ويقسم
والحــمـــد لله صامــد مــا انـحنيت
الصبـــر والثبـــات وفي ربي نحكم
الذكـــر ولستغفـــار بيهم نا انـجيت
الزمــان كي السيف يقطع ما يرحم
اشحــال اقطع ناس اعليهــم اقريت
كل يوم ايفــوت في اعمــرنا يزرم
وكـل خـطـــوة القـــدام كنـك افنيت
والمـــوت راهـو حـق تنبيه يا نايـم
كــم مــن اجنــازة اعـليهــا صليت
ســالــوني شي ناس وبقيت انخمـم
سالــوني عالــدنيــا ومنهــا اعييت
قلــت الهــم غـــرارة والكيس يفهم
مـا دامــت الحـــــد اقـبلنــا ظنيت
ســالوني عــالعـلــم الله مــن يعلـم
علمي راه محـدود ما يكفي شَكِّيـت
ســالــوني عالجنــة مين المــرسـم
دربـهــا مستقيــم لا ليــه اتهــديــت
اتفكــرت اشحــال فيهـا مــن انعــم
م تحرمنـا منهــا عفــوك رب البيت
وسالوني اشحــال كيـف نار جهنـم
ما رديـت اجواب خـليتهــم ومشيت
اتفكـرت حـــرهـــا يشــوي يابنـادم
الله ينجـينــي وكــل اللـــي حـبيــت
باذن الله لقــوي جــاهــز امصمــم
انحارب الشيــات والخاين ماحييت
عالمنكــر ننهي بكــل قـــوة عـازم
ونامر بالمعروف هذا عهـد اخذيت
نمدح بشعــاري اشبـاه الضرغـــم
وكل خاين شيات بشعاري اهجيت
بالصلاة اعليــك اقمر ابني هاشـم
بالصلاة اعليك صفحـاتي اطويت
