نتعاهد
الشاعر محي الدين قاتر
نتعاهد مدام ورقتنا بيضا
كي نتعاهد لاتخونيشي وعدي
ذاك ليوم تكون لفكار فريدة
ذاك ليوم يكون من ضمن عيادي
انعزك يا ساكتة جوف لكبدة
ذا مشهاب لعز في قلبي ڨادي
ذاك ليوم ندير لغزالي وعدة
ولبرود من جعب ليك يصادي
نهديلك شعري من لفخر قصيدة
ولمضمون يكون في لب جهادي
سميتك يا شاغلا بالي لبدة
من غيرك مانيش بونادم عادي
راحت روحي بيك تزيان بقعدة
وتحلالي كي نعود بإسمك نادي
انتي اسمك مانسب جيل لمودة
يعجب اسمك فيه بصمات جدادي
اسمك يا من لا درا بيه ونجدة
وإسمك يامن لا درا فيه كمادي
حالك حالي لتاح ولعز مصيدة
ونتغرم بخيالها عند وسادي
ونتخيل في وصافها وحدة وحدة
صابر بين هلاكها بلد نهادي
ما نغزر لخصامها ما نتحدى
نجمة هلت بين نجمات لهادي
هذي ولفي زينهها زاد تعدى
عربية ونجوعها من لسيادي
ڨمرة يلمع نزورها ليلة سودة
فصل ربيع وطابعو وردة نادي
كي فارس فوق لجواد بخصال وهدة
هذي ولفي طيفها صخرة وادي
ما يتزعزع حالها يوم شدة
من بفرحة دڨيت بالفخر وتادي
لحق نبوح باسمها عند لمبدا
وباحلامي خليتها درت عنادي
اسم غالي نلفضو بتنهيدة
ما عندي من غيرها يا حسادي
هيا هيا العمر ولمقصودة
نفتخر كي نقول وطني و بلادي
الجزائر غالية فوق لعدة
هيا غدة للعدو شبه زنادي
الشاعر محي الدين قاتر
رئيس مكتب الجمعية الجزائرية للأدب الشعبي
ولاية سيدي بلعباس / الجزائر
