من صابني فوق بساط
الشاعر خليفة قطاوي / الشلف .
الجزائر
من صابني فوق بساط يا لخوان
به نطوف و للبعيدة ليها نوصل
نعلى في جو و نحوم بعلو لمزان
و نشوف ام الخير في سماها نتجول
كيف ما كان من عهد سليمان
نبي الله و رد ذكره فالمنزل
نطوف على بر بلادي وطن شجعان
يرتاح خاطري يطفى المشهاب شاعل
مشطون من خاطري بحالي غيضان
في تفكاري ما لقيت ليها حل
راهم قوم العدا دارو ليه بلان
بحدود وخلقو بين العرب مشكل
هذي مدة و هي تخطط العديان
لتقسيم وطن العربان غاية ليها توصل
نحوم على بر الجزائر تطفى نيران
اللي راهي شاعلة يا خاوتي فداخل
نشوف ساحل و صحراء و كل مكان
ما نخلي بر إلا و ليه أنا نوصل
و نزيد للمغرب ذاك وطن العربان
ندور و نحوس فيه ثما ننزل
نجوب كل مكان نشهل لعيان
شمال فالسواحل صحراء و تل
وجدة و فاس و مكناس تزول حزان
و نزيد الأكادير و رباط لغيرهم نكمل
و من ثم نهبط لصحرا ننظم أوزان
فالعيون نعود بشاعري ليهم قايل
و نزيد لموريطانيا بلاد فصح و ميزان
وطن مليون شاعر نحوم ثما فساحل
نواڨشط عصمتها نلقي فيها غيوان
و نجوب برها و نحوسها بالكامل
و من ثم نصد لتونس شباح البلدان
المرسم الزين ثما عني يزول العل
سوسة و سفاقس تروى لعيان
الكاف و صحاري فيهم نتجول
ذوك أهل الطيب لوطني جيران
ما ظني فيها حد عنا بكرمه يبخل
و نزيد نكمل ليبيا نجوب كل مكان
ذيك عروسة المالح تعشقها دول
فيها كل خير تتنافس عليها عديان
و الجزائر ترفض من فيها يدخل
مرسم زين كي طرابلس بالعز تبان
دهموها حساد خلقو فيها العدا مشكل
تركيا و فرنسا ضحاو ليها شيطان
بين سراج و حفتر نيران بيناتهم تشعل
و زادوا عانوهم العداء فيها خيان
راهم باينين و الأمر واضح و مفصل
هذا بر المغرب العربي ما فيه نقصان
معدودة بحساب خمس دول
و من ثم نصد لمصر روح عجلان
الأهرامات و المقامات ليهم ننزل
القاهرة و الأسكندرية سنوان
و نزيد الإسماعلية فيها نترجل
نزور جامع الأزهر ثما يا لخوان
مبني من عهد الفاطمين إرث مفضل
من ثما نهبط ماوجه لدولة السودان
أم درمان و الخرطوم عنهم انسول
نطوف برور ما شفتهمش عيان
بر رجالة لعلى لي فيها نعقل
من ثم نصد نقصد بحر العربان
نشوف شطوط و كل سواحل
نصد لسعودية تطفى نيران
حب الحبيب مشوق بناره يشعل
لمدينة منورة نصد ليها عجلان
قبر نبي يلزم نشوفه بنجل
و من ثم نصد لمكة نلقى بريان
بيت الله اللي فيه القرأن أنزل
وجدة مع رياض و طائف تعيان
و كل مقامات ليها ساداتي نوصل
بعدها للكويت نغدى يا صدقان
نجوب ثما نلقى محبوب ليه خصال
مصطفى من ترك ذاك شباح عيان
غازي فرسائل يدرس يفصل تفصال
و ماننساش العراق وطن محان
نزور قبر الجيلاني به انا نتوسل
نتبرك بزيارة صالحين بعهود متان
حبي لرجال الله من صغري حاصل
ندهم سمراء و كربلاء و الكوفة ثان
و نزيد لكركوك و منها ثما للموصل
و دجلة و الفرات نشرب ماهم عطشان
ذوك ويدان الجنة نبي لينا قايل
بعدها سوريا نعڨب ليها نيشان
أرض المحشر ذيك مهبط الرسل
دمشق و حلب و حمص ما نترك كوان
و نزيد للاذقية ندور ثما بالكل
من ثم نغدى للأردن يا خويا صفوان
عاصمتها و كل ترابها فيه أنا نتجول
نعلى ببساطي من ثم نتوجه لبنان
بيروت و بلعبك ولايات ليهم نرحل
نجوب فيها و نعرف كل مكان
حسد بني صهيون دايرين الباطل
و ما ننساش فلسطين قرة لعيان
بيت المقدس ليه روح عاجل
نصلي ركعتين و نتوسل لرحمان
ندعيه بالإسم الأعظم يتلم الشمل
و تتوحد بقدرته كل العربان
ويعود القدس لينا و يزول العل
نجوب و نوصل لبيت لحم ثان
مكان ولادة المسيح نكبر و نهلل
غزة و أريحا نلقى لذاتي بريان
و رفح البوابة فيها ثما ننزل
من المشرق نصد من ثما عجلان
البحرين نجوب ربوعها بالكل
و مننساش الإمارات نقصدها يا مروان
لوما تطبيع الحكام منها نرحل
دبي و شارقة بناوها أمريكان
أبراج عالية فالعلا تبان مڨابل
و نزيد قطر نتجول و روح ليها ثان
ندهم الدوحة و غيرها لتراب نكمل
شعبها زين فيه خصال العربان
ما نتهم حد راه العلماني للحكم وصل
من ثم نهبط لليمن ساداتي نيشان
المكان الزين فيه ثابب بأصل
شعب زين للعاهد ثوري ما خان
العهود مقيومة بهم خالقي متكفل
راه إلا وسطه شاعلة نيران
تيتمت اطفال و قوات الأرامل
السعودية و الحوثين صفى ما بان
راه باقي الشعب اليمني متهول
طالب ربي يصفى خباله بحسان
بإذن الكريم يزول فيه كل خبل
من ثم نصد متوجه للعمان
مسقط فيه نحوس باغي ننزل
مساجد و أثار تتغذى لعيان
راه إلا شوقي تڨدي نيرانه بداخل
من ثم نعود لوطني قرة لعيان
الجزائر وطن العز للأمة شامل
قول ثعالبي ما فيه النكران
رجل من صالحين عنه قايل
في أحواله عجب باين للفطان
ما يدوم مكروه لشعبه بالكل
ما حط عسر ولا ضاق زمان
إلا يسر جابو ربي فالجزائر أنزل
هذي بيات نظمت بذا ديوان
نسجتها بعرفي لساداتي قايل
خليفة سطر ذو بيوت الغيوان
ڨطاوي راه يا خاوتي دمعه سايل
على حال اللي وصلنا ليه المشيان
كي تفركتو نجوعنا وصلنا ذل
ربي بدل حال بحال جونا يزيان
بدل بساعة خير لينا يتلم الشمل
قصيد منظمه في شهر شعبان
رابع عاشر يوم فيه أنا قايل
عام الهجري يظهر بالكتب يبان
ألف و ربعمية بتاريخ مسجل
و زيد ثنين و ربعين بلا نقصان
ذا هو تاريخ اللي فيه غيوان أكمل
