*في الموضوع إنَّ:*
✍ حسن القحل :
طحنا الوقت بظروفه طحنا
وكل منطحن منا ومنا
تبدل وقتنا وشحت ظروفه
غبار الوقت وعجاجه عمنا
ماعد ندري لوين الحال ساير
ولا ندري وش اللي له وصلنا
نشوف وجيهنا دايم عبوسه
ونادر مانشوف إنا بسمنا
تقاطعنا وكل بات لاهي
وعن أحوال بعض ما سألنا
نصيح من الغلا ومن المصايب
وأمراض وأوباء دهنا
نعاني بلا سبب كل يعاني
وكل صاح من حاله وونا
ماعد ندري الزمن سبة بلانا
أو إنه ذا البلا الموجود منا
نسينا الموت ونسينا المقابر
ونذكرها إذا ميت دفنا
وننسى جملة الموضوع فيها
وننساها إذا حنا ظهرنا
وننسى إنا بها بكره بندفن
إذا حانت لنا ساعة أجلنا
نعود الها بلا زاد وحصيله
نسينى زادنا بدنيا سفرنا
فيا الله رحمتك ترحم عبادك
إذا متنا وقد قصر عملنا
ألا يالله ماخاب الرجا بك
إذا قصر فبك يالله أملنا
حسافه وينها ذيك الليالي
وأوقات بها كنا إنتهنى
زمان الطيبين إللي يقولوا
ماهوا بهذا الزمان إللي غبنا
زمان الأنس وأيام البساطه
وأيام الكرم من دون منا
إذا شفنا الصور والا المقاطع
تطير أرواحنا غصب حدنا
ولا جابوا لذاك الوقت طاري
نصيح الآه والدمعه غلبنا
حسافه للأسف كل شي تبدل
وغرتنا المظاهر وافتننا
نشوف أوضاع ما مرت علينا
وأخاف يكون في الموضوع إنَّ
