التك تكة:
✒️ حسن القحل :
يازمان التك تكه وش عاد باقي
كل عجبٍ فيك شافته العوالم
صاير التكتك مساحه للتلاقي
وللاسر والمجتمع والدين هادم
كله ابثوثٍ غثيثة يارفاقي
ع قلوب الناس وارواح الاوادم
دون اهداف وبلا مضمون راقي
لا ثقافه لاقيم لا علم غانم
مسرحٍ ضم الحثاله وكل راق
وكل مفسر يدعي تفسير حالم
وكلهم يسعى لشهره وارتزاق
من جيوب الناس ويدور دراهم
واغلبه تحريض ع خالع وطلاقي
وبث انواع المفاسد والجرائم
ساحةٍ ضمت فسادٍ باتفاق
ومسرح إلهدم المبادئ والمكارم
عبر بث الفبركه ولاختلاق
وكلها لجل التكسب والغنايم
السوالف والشتايم والطقاق
اغلبه ثمثيل من عليا وسالم
لاجتذاب أهل السذاجه للسواقي
واجتذاب إللي مغفل والبهايم
كل من يدخل يشوف الانطلاقي
يحرق أعصابه ويخرج منه نادم
شفنا فيه الناس في لمه وفراق
واحتفال بمولد أطفال وولايم
وشفنا من ضمن المظاهر والنفاق
بث تكريمٍ لسواقٍ وخادم
وشفنا برٍ مصطنع ماله مذاق
والترزز في المقابر والمآتم
وشفنا شيٍ ما يقال ولا يطاق
في والبجاحة والوقاحه والتصادم
لجل شهره وللظهور ولسباق
في اجتذاب الناس في بث القمايم
وش بقى إللي ما ظهر وش عاد باقي
وش بقى يا آخر زمن وش عاد قادم
