(فز قلبي)
✍️محمد الثوعي/ السعودية :
كل ما اقبلت زاير فز قلبي وراغ
روغت اللي مهدد بالقتل ياجميل
ارتبك ثم اصوّت من يجيب الشماغ
غترتي فوق راسي والعقال الثقيل
ضعت كلي وادوّر للكلام المصاغ
من جميل النثر والا القصيد الجزيل
مشغل القلب كله واستثار الدماغ
فكرة ٍ بعد فكره مابقى لي دليل
من تعدى حدود المعرفه والبلاغ
مايدور كثير الهرج والا القليل
الحب ماهو مجرد لعب وقت الفراغ
ولا بضاعه متاحه تشتريها وتشيل
