شموع الليل
شعر✍🏻 حسن بن قاسم القحل :-
ذابت شموع الليل من طول رجواك
وطال انتظاري وانت بالحيل ابطيت
ارقب سحاب الليل ونجوم الافلاك
وياما على طاري خيالك تقهويت
اخال نور البدر طلت محياك
كل ماتبدى نور ضوه اطليت
ويفز قلبي كل ما حل طرياك
ونفسي اعللها بباكر وياليت
يالي ملكت الروح واحساس مضناك
ملكتني كلي وفكري استحليت
يامطول بعادك هو ويش الي خلاك
تطول غيابك والى اليوم ماجيت
عسى الولي ربي من الشر ياقاك
ويحقق آمالك وكل ماتمنيت
يفداك قلب عانق الصمت يفداك
وعساك متهني الا اصبحت وامسيت
ياغايب عني انا كيف بانساك
وعرشك وسط قلبي وفوقه تساويت
متى يجي باكر واهنا بلقياك
من عقب ماذابت شموعي وعانيت
