مزرعة قرت العين

✍🏻 سمير الشحيمي : 

*أهجر قصور الذل لو هي من ذهب وأسكن بيوت العز لو هي خرابه*

نزل الليل وعزيز ورفاقه مقيدين بلأعمدة قد تقطعت اقمصتهم من شدة ضرب الكرباج والدماء تسيل من ظهورهم وجنوبهم.

منزل محمود
يلقي محمود جسده على الأرض في أرضية غرفة المعيشة وأتت زوجته رقيه وقالت له : ها شو ماتبي تروح تسبح وتغير ملابسك عشان أحط العشاء.
محمود : أريد أريح ظهري مالي نفس حق شي.
رقيه : اللي صار نعم يسد النفس.
محمود : أنتي حطيتيني بموقف صعب جداً جدام السيد سفيان.
رقيه : عيل راح يرضيك إذا انطرد عزيز واللي معاه برا المزرعه ومعاهم أعيالهم وزوجاتهم بيعيشوا بالشوارع على الأقل اهنيه عندهم بيوت وهاي المزرعه من يوم يومها قايمه على تعب وشقى اللي يشتغلون فيها من أيام اجدودنا.
محمود : أكيد ماراح يرضيني بس أنا ماريد أعادي السيد سفيان.
رقيه : السيدة روعه ربي يحفظها وقفت معانا وهالشي لصالح الجميع.
محمود : المشكلة اللي بتصير إن الكل من العمال والفلاحين بيكرهوني باللي سويته واللي صار غصب عني.
رقيه : أكيد غصب عنك ولازم همه يتفهمون هالشي يتحملون جلد عشان يحافظون على بيوتهم وعملهم خلهم يفكرون فيها زين بعقولهم مش بقلوبهم.
محمود يناظر السقف وهو يتنهد.

القصر
سفيان يدخل إلى غرفة نومه ولم يجد روعه بالغرفة فخرج منها وتوجه إلى الغرفة الأخرى ووجد بها روعه وهيه تقلب كتاب بين يديها فجلس بجوارها فصدة عنه بلأتجاه الآخر فقال سفيان : بعدك زعلانه مني؟
روعه لا تنظر إليه ولا ترد عليه فقال : روعه أكلمك ردي ، أنا من قبل مخبرنك لا تتدخلي بشغلي واللي أسويه مع العمال والفلاحين.
روعه تضع الكتاب على الطاولة اللي أمامها وقالت : بس هذيلا بشر ما حيوانات عشان تعاملهم بهاي الطريقة.
سفيان : لو أنا ماشديت عليهم راح يقوون علي وصعب اسيطر عليهم فهمي علي.
روعه : عمر الظلم وتخويف الناس يجيب محبه واستقرار.
سفيان : دام أنهم معاي بالمزرعه أنا مسؤول عنهم وهم ملكي بأجسادهم حتى أرواحهم.
روعه : أستغفر ربك أنت ما اشتريتهم عشان تقول هالكلام أعرف إنك عصبي بس تكون أناني بهاي الطريقة أنصحك تراجع أسلوبك.
سفيان يتنهد : حبيبتي خلاص أنا آسف قومي تعالي ورجعي غرفتنا.
روعه : مالي خلق أريد أجلس بروحي الليله.
سفيان : أهون عليك تخليني أنام بروحي؟
روعه : أيوه عشان اللي سويته.
سفيان : خلاص خلينى ننسى اللي صار.
روعه : على شرط ممكن أرجع غرفتي.
سفيان : شو هوه شرطك؟
روعه : اللي رابطنهم برا.
سفيان ينهض من مكانه وهو يقول بغضب : اليوم ساومتوني على قراراتي وقدمت تنازلات ووافقت عليها عشانك بس أكثر من كذيه ماراح أنزل هيبتي جدام العمال والفلاحين بمزرعة قرت العين فاهمه يا روعه.
روعه : ماريدك تقدم تنازلات ولا شي بس حرام اللي برا ينزفون دم وبدون أكل.
سفيان : شو المطلوب؟
روعه : انداويهم ونأكلهم.
سفيان : أنا قايل يومين من دون أكل وشرب.
روعه : سر محد راح يعرف عن هالشي أوعدك.
سفيان يفكر وتحرك بالغرفه وتوقف وقال : تمام بس إذا سمعت أن اللي راح يصير عرفوا عنه باقي سكان المزرعه بسوي شي راح يزعلك وماراح يهمني.
روعه تنهض فرحه : ماراح يعرف حد وعد مني.
سفيان : خلاص راح أخبر الحراس يسوون اللي تبيه.
روعه : بخاطري أسوي هالشي بيديني لو تسمح.
سفيان : لا خلي الحراس والخدم هم يسوون هالشي.
روعه : أرجوك سفيان أنا بسوي هالشي معاي خدامات القصر بخاطري أرجوك.
سفيان يصمت ويفكر ثم قال : تمام سيري سوي اللي تشوفيه.
روعه تحضن سفيان بقوه وتشكره : أنت أحسن وأحلى زوج بهاي الدنيا.
سفيان : اللحين من شوي معصبه علي وتغير الوضع لإحلى زوج زين زين ومثل ماخبرتك محد يعرف بلي راح يصير برا وشددي على اللي بيروحن معاك يكون الموضوع سر إذا طلع برا بيكون في حساب عسير وماراح أسامح حد.
روعه : ولا يهمك بيكون طي الكتمان مثل ظلام الليل.
وتحركت مسرعه روعه خارج الغرفة إلى مقر الخدم وطلبت 3 من الخدامات من ضمنهن وسن مرافقتها ومعالجة عزيز وزملائه من جروحهم فقال عزيز : سيدة روعه ألف شكر لك بس هالشي اللي تسويه راح يزعل السيد سفيان.
روعه : عزيز كلامي ماراح أعيده فحاول تفهم كلامي زين أنت وربعك.
عزيز : تحت أمرك سيدة روعه.
روعه : اللي يصير اللحين من علاج وأكل ما يطلع من هذا المكان اللي نحن فيه لأن إذا السيد سفيان شم خبر والناس جلست تتكلم بيكون عقابي وعقابكم عسير وما أظن أنكم تبون لي ولكم المضره؟
عزيز : سيدة روعه نفديك بأرواحنا.
روعه : أبي وعد اللحين هالشي ما يطلع برا مكانا.
عزيز وزملائه: وعد سيدة روعه.

يتبع..