زيـــن الصفــــــــات
الشاعر رزق الله معمر / المدية / الجزائر
سهلي يا الله عالي الدرجــــــات
نكتب كلمة على سيرة حياتو
محمد نبينا زين الصفـــــــــــات
صلى الله عليه شفيع اماتــــو
ماني فقيه فسار السُــــــــورات
ماني شاعر وازن ابياتـــــــــو
ماني شيخ قاري فاللوحـــــــات
ماني مالصلاح لي مدحاتــــو
غير قنيديز نهجي فالكلمـــات
ولذكر الرسول النشوة جاتــو
نارُ فالجواجي لهبت وقــــــدات
ومحبتو فالقلب زادت ملكاتــو
الناس سافرت راحت وجـــــات
وانا مازال متشوق لزوراتـــو
صلو عليه سيد الكائنـــــــــــات
ومن طاعُ سعدت حياتــــــــو
السراج المنير والرحمة المهدات
واسمُ فالأزل الآية ذكراتــو
دعوة ابراهيم ياسامع لبيــــات
وسيدنا عيسى تحقت بشراتـو
نسل بنوهاشم خيار النشْئَـــات
ويوم ان زاد ظهرت دلالاتــــو
قصور الشام بالنور ضـــــوات
وبحيرة ساوة ماها بلعاتـــــــو
نار فارس خمدت وطفــــــــات
وايوان كسرى تهدمت شرفاتو
تبكشت الملوت مانطقت بكلمات
واصنام الكعبة سقطت باشاراتو
في ختانو قيلت روايـــــــــــات
والحق سبحانو عالم بخلقاتــــو
في عام الفيل ميلادُ بالــــــذات
حين أبرهى النفس غواتـــــــــو
على هدم الكعبة حكماتو شحنات
لكن الأبابيل بالسجين رماتو
ابن الذبيحين يافاهم لبيــــــات
وعبدالله باباه ما شافو بعويناتو
تكفل به جدُ عَوْض البابــــات
وسعدك يا حليمة لي رضعاتــــو
بعد الفقر بيتها عمرت غنــات
وحسدوها ناسها باسباب بركاتو
وجرح الصدر حيٌر اليمـــــات
رجعاتُ لماليه خافت من مولاتو
تربى يتيم حين الأم توفـــــــات
وبعد الجد بيت العم أواتـــــــــــو
نشأ وترعرع مع الوليـــــدات
وبوطالب ديما حاط عليه نظراتو
ساهم فالكعبة حين التبنـــــات
ورفع الحجر الأسود بحكماتـو
رعى الغنم وحفظ الآمانـــــات
وخديجة كانت أول زوجاتـــــــو
حراء كانلُ خيار الخلـــــــوات
جبلُ عالي وموالف طلعاتـــــو
بعد الربعين النبوة بـــــــــدات
اكتمل عقلُ والقدرة ناداتـــــــو
كلام الله والرسالة جــــــــــات
حاملها ملك يخلع بطلاتــــــــو
السيد جبرائيل علمُ كلمــــــات
وبسورة العلق كانت بداياتــو
نبينا الأمي حكماتو الدهشـات
وراح الملك وخلاه بحيراتـــــو
رجع لزوجتو في رجفـــــــات
حسباتو مريض بغطاها دثراتو
حكالها قصتُ قالت هيهـــــات
ربي ما يخليك وللحبر الداتـــو
سمعُ وَرَقَة وتأمل فالشُرُوحات
قالُ ذاك الناموس يافاهم معناتو
مرة مرة ويجيك على غفلات
هيأ روحك يا محمد لمُلاقاتـــــــــو
اختارك الله من بين المخلوقات
وبنو نوفل فشالو حصراتــــو
بعد النبوة راك تتلقى صعوبات
كيما تلقاوها لنبياء لي فاتــــو
بدات الدعوة لطي الصفحــــات
وقليل من آمن بالرسالة لي جاتو
شاعت اخبارُ في كل الجهـــات
وخير الرجال ساندوه في دعواتو
قريش عادو منُو في غضبــات
وكلها وكفاه صرح بتصريحاتـــــو
ذا قال مجنون لازملــو زورات
ولاخر قال كاهن وساحر بكذباتـــو
عمدو على قتالو في هجمـــات
وقداهن اصحاب عن جالو ماتــــو
أهل الطائف رماوه بحجــــرات
رفضوه وضربوه وسالت دموماتو
عام الحزن وكثرت الخيبـــــات
مات العم والزوجة ثان وخلاتــــــو
وكرمُ ربي بخيار الرحـــــلات
الاسراء والمعراج شحال فرحاتو
من مكة لبيت المقدس فالظلمات
وبجميع الأنبياء قام صلاتـــــــــو
عرج به البوراق لسبع سماوات
وسدرة المنتهى آخر محطاتــــو
شرفُ الاله بذيك النظــــــــرات
رحلة ربانية زادت سعداتــــــــــو
انفرضت عليه خمس اوقــــات
والحسنة بعشر امثالها في احسباتو
شاف ما شاف يا ســــــــــادات
الجنة والنار والرسل لي سبقاتـــو
بعد العودة احكلهم القصـــــات
وقليل منا الناس اللي صدقاتـــــــو
الكثرة منهم قالو كذبـــــــــــات
والصاحب بوبكر صدقُ في غيباتو
ملك الحبشة ما قبل هديــــــات
وذيك المساندة زادت رفعاتــــــــو
عاداو اماليه لا علاقة بقـــــات
ولشعاب مكة رماتهم ورماتــــــو
تعانت قريش وظهرت المشادات
ما بقى قعاد وتغير حالاتــــــــو
سارت ليام والهموم قـــــــوات
ولجهة يثرب القدرة ناداتـــــــــو
خرج قدامهم والعيون عمـــات
ومكايد قريش مولاها ما نفعاتــــو
دهشو وما عرفو كيف صـرات
لقاو علي راقد في غفواتــــــــــو
هجر من مكة والعين بكــــــات
ولغار ثور قريش تَبْعَاتـــــــــــــو
لقاو الحمامة قايمة عالعظمات
وباب الغار العنكبوت سداتــــــــو
خاب ظنهم ورجعو وبالآهــات
ودليل قريش مانفعت خبراتــــــو
صلى الله عليه حالب الشــــــاة
بعد الهزل سقاتهم وسقاتـــــــــو
عادت أم معبد في حيــــــــرات
وبابيات شعرية نبينا مدحاتـــــــو
سراقة غواتو ذيك الجائــــزات
وبعد لي لقاه فشلت محاولاتـــــو
يثرب بيه تنورت وبهـــــــــات
بنى فيها مسجد لقيام صلاتـــــــو
آذان بلال ماحلاه باصــــــوات
وقداهن مهاجرين تبعوه لرحلاتو
بالمدينة المنورة ياك تسمــات
وعم الخير على لي نصراتــــــــو
أواوه الأنصار والناس تآخات
والأوس والخزرج حضرو لجساتو
شوكة المسلميت زادت تقوات
وبدر وأحد اول غزواتــــــــــــو
عمو حمزة سيد الشهداء ما ت
حزن نبينا وطيح دمعاتـــــــــــو
قاد المسلمين كذا من غزوات
وفتح مكة كان خيار يماتــــــــــو
دخل جيشُ من ثلث جهـــــــات
حق الحق وهدم لصنام باعصاتو
قال من آمن فات لي فــــــــات
ولي تعنت ما يسلك من ضرباتو
خطبة الوداع آخر الخطبـــــات
وصى المسلمين وبلغ رسالاتو
دين الاسلام منهاج الحيـــــــاة
وسعد من طاعو وتبع سُناتـــو
حرر مكة من حكم الطوغــــات
ورجع لمدينتُ لي حبها وحباتو
شارك معاهم في كذا فتوحـــات
ومعارك كثار قايد غزواتــــــو
خلالها الصحاب شافو معجزات
نصرو الله والملايكة حماتــو
نبي الرحمة كلم الحياوانـــــات
وسمع الجماد وهو في خطباتنو
جذع النخلة والغزالة لي شتكات
ومهما نعدد ما نوفي معجزاتو
وكل بداية ليها نهايــــــــــــــات
وبعد الستين الساعة لحقاتـــو
ملك الموت استأذن ياســـــادات
جبلتك من الله السلام بذاتـــــو
تحب يغنيك ويعطيك الخيــــرات
ولا تفضل الموت ورفقاتــــــو
قالو ربي ما وعدني بحيـــــــاة
نفذ مهمتك والمنية وفاتـــــــو
بكاو الصحابة بخبر الوفـــــاة
وبعضهم كذب من قوة لي بغاتو
لكن أمر الله والقدرة جــــرَات
وامنا عايشة في بيتها دفناتــــو
صلى الله عليه ألـــــــف صلاة
شفيعنا يوم نتلمو في ساحتـــو
يوم يقول أمتي أمتي يالله جات
يجاوبُ اشفع تُشَفَعْ مايخيب ظناتو
سعد لي شرب من حوضُ حفنات
وسعد لي نال يومها شفاعتــو
