بين البارح و اليوم
الشاعر جمال جلالي _ الجزائر
شعر شعبي جزائري
انــا عربـي بـن عــرب ولد الخيمة
رافع راســـي دايمن همــة والشان
اصلي بدوي مانخالفش الكلمة
مــا نشهــد بالزور مـا نعرف بهتان
متربـي ع العــز راضــع صدر اما
و اسرحت الغاليم طيشت الخرفان
عافرت نعاجي الڨرنة و الشخمة
رومــت البڨــرة على عيطة جديان
صيدت الڨنفـود زعڨــت الهامة
نتڨت الجربوع مــن وسط الغيران
و بنيت المنداف حجلة و حمامة
كدريــة و حبـــــار و طيـــور السمان
سرجت الكيدار و حصدت النعمة
مــاشيها لوعــار و الظلمـة حفيان
جـل نهـاري بيـن ڨرن و زيدومة
جـرجير و خٌبيــز ممروسـة بدهان
محـلهـا ليـام كــي كانــت اللمة
و حاجيني بخرايـــــف بنات السلطان
على عشبة خضار تحكي لميمة
في طرف الكانون على ضي النيران
ملي غابت عشبة خضار ما صبت مطار ما لقات الناڨة علاش تربي لحوار …
دار الوقـت و جـار ساكن باطيمة
دار هوايـــا طــــول لبنـــات الجيران
زينـب عجبتنـــي و سلبت نعيمة
لا لا وقيـــــلا تـــــوالــــمنـي حنان
بيضة و السمرا وطـارت لحمامة
طريڨ الليسي جات فـالعڨبة نيشان
طالـع هاود في مهاميد و ظلمة
شي مـرا زاهـي و شـي مرا زعفان
حبيناهــم نـاس بالشان و همة
و الدونــي بعنـاه في سوڨ النسوان
بـالغالي نشرو و زدنــا في السومة
و الخلطـــة تــردي و مــافيهــا لمان
الخلطة تردي و الجرب يعدي لوما الخلطة ولدك ما يضرب ولدي…
شاب الراس بقيت وحدي لا لومة
نتفكـر مـــا كـــان يـامـــا كـــان و كان
يــا حصـراه عليـك يـــا ذيك اللمة
و يــــا حصـــراه عليك يـا دنية لامان
راني مثـل الطيــــر مكسور الهمة
و نغـــرد في ســـرب و انيــا عطشان
هــارب قاصد شوركم ناس الهمة
غيـــثــونـي بـــالله شربـــــة بــالقطران
قولو لـــي بـــالله زيحــو ذ الغمة
بيــن ضلوعـي ساكنـة أمــري حيران
عنـــي لاه اللــوم رانـي في عتمة
يــا لحبـــاب نغيــض يوسوس شيطان
المكتوبة في الجبين ما يمحوها اليدين …
نخطيهـــا مــرات نعبى يا شوما
نستغـفـــر ثانــــي و نرجـــــع للديان
يقدر مــا يشاء و اقـدارو حكمة
يعفو عـن هـذا و عـن هــذا غضبان
فــالرابـع شــوال تميـت الكلمة
و طلبنــــا م الله يتقبـل رمضان
ألــــف وربـــع ميـا و ربعيـــن سما
زيدلهــا خمســـة يـــــا قـــاري لوزان
وسمـايــا نعطيـك جــلالي نقمة
جمــال يسمــوه وجـدودو فرسان
و نختم بالصلاة على سيد الأمة
محمــــــد شفيعنــــــا نــــــور البيان
صلى الله عليك يـــا بو فاطيمة
صلى الله عليـــك يا حبيب الرحمان
صلى الله عليـــك يا حبيب الرحمان
