أصل الغجر في مصر

✍️ اللواء جمال رشاد :

أحيانا نسمع واحد بيزعق ويقول ياغجر يانَوَر
مين بقه الغجر والنَوَر دول ؟
الغجر في مصر ٣ أقسام هم
الغجر، والحلب، والنَوَر،
وكمان ممكن يتسموا الهنجرانية، والتتر، والمساليب.

يقال ان الغجر أو شعب الدوم أو الغغار وصلوا مصر في العصر الروماني جايين من وسط وجنوب ٱسيا والهند ، واختلطوا بالمصريين واتعرفوا فى العالم بالمصطلح Gypsy، و هو اختصار لكلمة مصرية.

الغجر بيعيشوا في مصر في تجمعات كل تجمع فيه عدد من الأسر مابين أسرة أو اثنين أو مئات الأسر. والغجر المصريين بيحبوا الترحال، لكن بعضهم بيفضل يعيش حياة مستقرة أو شبه مستقرة يعني يتنقل بشكل موسمي، وأثناء تنقله يكون ليه أماكن (قرى عبور) يستقر فيها بين القرى. ومن نماذج الجماعات المستقرة غجر قرية الروبيات بالفيوم، وهنا نربط مابين اسم الروبيات والروبية اللي هي عملة الهند وموطن الغجر الأصليين..والغجر اختاروا القرية دي مقر أساسي ليهم لأنها بين خمس قرى أخري.

تفاصيل حياة الغجر
الغجر اللي بيحبوا الاستقرار بيعيشوا في بيوت تتناسب مع المنطقة الي ساكنين فيها ومع مستواهم المادي برضه ، ممكن تكون البيوت مبنية بالطوب الأحمر، أو بالطوب اللبن، أو بالقش والبوص، وفي نص مساكنهم حوش واسع فيه الأغنام والكلاب.
أما محتويات البيت فلا تتعدى المعدات الضرورية والأغطية والفرش،. والغجر بيحبوا بصفة عامة السكن في أطراف القرى، منعا للاختلاط بالأهالي، أو عشان يبعدوا الأنظار عن نشاطهم وتحركاتهم.
والغجر مش بيلجأوا للقانون، بل يحكمهم مجلس اسمه مجلس المغارمة، وبيلجأوا الي ((البشعة)) لاكتشاف الكذب، والمجلس عبارة عن كبير الغجر يعاونه ثلاثة رجال.
الغجر بيشتغلوا في صناعة المناخل من شعر الخيل، وعمل المسامير والرقص الشعبي وتدريب القرود وأعمال البهلوانات في الموالد، لكن النساء بيشتغلوا في قراءة الطالع وعمل الوشم، و الغناء والرقص وبيتسموا غازية أو ربابة….وكمان بيمارسوا التسول.
الست تتسول وينتظرها الزوج ترجع له بالفلوس والمؤن، وجماعة النوَر متخصصين في السرقة بطرقها الكتيرة والست هنا اسمها (قصاصة).
والغجر بيستبيحوا السرقة لاقتناعهم بأن الكون كله ملك لله، وبالتالي فجميع البشر متاح لهم كل مافي هذا الكون لكن عندهم قواعد في السرقة من قديم الازل منها انه لا يجوز أن تسرق امرأة غجريةً امرأة أخرى غجرية زيها، وكمان لا يجوز أن تسرق فقير أو عاجز.
الغجر بيشكوا في اي حد ، وبيحبوا يحتفظوا بتفاصيل حياتهم بشكل سري، ودايما بينكروا أصلهم الغجري، ومش بيحبوا يبانوا انهم كتير وأقوياء.

الزواج عند الغجر
الغجر مش بيتجوزوا من بره ابدا… ولو حصل فالعريس الغريب بيبقي اسمه «الإفرنجى» ومن طقوس الزواج ان العريس يحلق شعره قبل مايتقدم لخطبة عروسته.
الغجرى الغني بيبقي عدد زوجاته وقروده كتير ، ومهر البنت الغجرية ممكن يوصل مائة ألف جنيه لانها خبرة في السرقة والرقص وفتح المندل، عشان كده بتتعمل احتفالات كبيرة لما بتتولد بنت.
الغجرية بتصبغ شعرها باللون الأصفر وده من علامات الجمال.
معظم الأغاني اللي بيغنيها الغجر في أفراحهم مليانة بحكايات العشاق اللي حبوا بنات الغجر لكن حبهم ما انتهاش بزواج.
ماحدش عارف عدد الغجر في مصر على وجه التحديد وزمان حكام مصر كانوا بيجبروا الغجر يدفعوا ضريبة الرؤوس، فده خلاهم يتهربوا من دفع الضريبة بالهرب لقرى وحدود الصحراء.

في اسكندرية موجود أعداد ملحوظة في منطقة غبريال وكانوا برضه في سيدي بشر والعصافرة ، وكمان في قرىة طهواي بالدقهلية وكفر الغجر بالشرقية وحوش الغجر بسور مجرى العيون بمصر القديمة وقرية سنباط والمقطم وأبو النمرس ومنشية ناصر.ومن مشاهير الغجر الريس متقال والمطربة خضرة محمد خضر