منزل صقر

✍️ سمير الشحيمي :

شيهانه على سريرها تفكر وحسناء تذاكر وعلى أذنها سماعة بلوتوث تستمع لبعض الأغاني وعنقاء نايمه على سريرها.
صوت طرق على الباب شيهانه: تفضل.
يفتح الباب ويطل منه رأس شاهين وينظر لشيهانه وقال: نايمه؟
شيهانه: لا في شي؟
شاهين : تعالي أبيك بموضوع بغرفتي.
شيهانه: قول شو عندك؟
شاهين : انتظرك بغرفتي لا تتأخري.
أغلق الباب.
شيهانه تنهض من سريرها وتفكر بلي يبيه شاهين أو أنه عرف شو صار بالكليه.
وصلت شيهانه إلى غرفة شاهين ودخلت وقالت : وين باشق؟
شاهين : بعده عن يرجع.
شيهانه: خير شوفيه؟
شاهين : شو هذا اللي صار بالكلية اليوم؟
شيهانه: شو صار؟
شاهين : بلا عبط شيهانه قولي ترا خبرني منير بلي صار بس حاب أعرف التفاصيل.
شيهانه تتنهد وتجلس على طرف سرير باشق وقالت : تعرف أنا أبيع فساتين واجيبهن من تاجره وشيخة زميلتي اشترت مني ولكن طلع في الفساتين عيوب خياطه أو تقدر تقول إن التاجره غشتني وعلى هالاساس طلبت مني شيخه أرجع فلوسها.
شاهين : وبعدين؟
شيهانه: كلمت التاجرة ورفضت ترجع المبالغ وطاحت السالفه على راسي.
شاهين : انزين سوالف بنات هذا اللي إسمه عبد الله شو دخله بالنص.
شيهانه:شيخه أخته جابته ويهدد إذا مارجعت فلوس أخته بيبلغ الشرطة.
شاهين : تخسي إلا هوه ولا أكبر شنب يقدر يكلمك وأنا موجود.
شيهانه: بس هم أصحاب حق وأنا انغشيت بالتاجره.
شاهين : مهما كان هالشي مايسمحله يكلمك ويصرخ عليك جدام الخلق بالكلية عيب كان يعرف العيب خلاص الموضوع معاي باكر على نهاية الدوام أنا بكون موجود وبشوف شو يقدر يسويه هالتعبان.
شيهانه: الله لا يحرمني منك.
شاهين : أفا عليك محتاره وتفكري وأخوانك موجودين خلي راسك مرفوع يا بنت صقر نحن صقور ما يهزونا هالخواريف.
شيهانه تبتسم وقال شاهين : أيوه كذيه أبيك ماتفارقك الابتسامه تقدري تروحي غرفتك وتنامي وأنتي مرتاحه.
شيهانه : تصبح على خير ياخوي.
شاهين : وأنتي من أهله.
وغادرت شيهانه إلى غرفتها وهيه سعيده ومرتاحة البال.

العاصمة
يدخل صقر شقة زوجته رحمه وكانت الخدامه موجوده مع أبناء رحمه الصغار وألقى عليهم التحيه وطلب من الخدامه تحضر له الشاي وبعض الخفايف، حمل هاتفه واتصل على رحمه: هلا حبيبتي كيفك أنا وصلت حالياً هنيه بالشقة مع العيال.
رحمه : حمدالله على السلامه ماتوقعتك تجي بهاي السرعه.
صقر : طلعت بدري من البيت حتى قبل عن يطلعون الاعيال لمدارسهم.
رحمه : تمام أنا بخلص كم شغله وبترخص وبجيك.
صقر : خذي راحتك الأمور طيبه.
رحمه : تمام غدانا اليوم فبيت أبوي.
صقر : كنت أفكر اتغدا معاك ومع أعيالك الصغار.
رحمه : بكره خليها لازم تشوف أبوي اليوم.
صقر : والله أفكر أبوك شو يبي مني بهاي السرعه.
رحمه : كل خير، يالله نتواصل بعدين دير بالك.
وأغلقت الخط.

الكلية
قرب إنتهاء وقت الدراسه وشارف الطلاب بالمغادرة وشيهانه مع نادره تنتظر شاهين ،أتت شيخه ومعها زميلتها ووقفت أمام شيهانه وقالت : ها كيف جبتي فلوسي؟
شيهانه : راح اجيبهن لا تستعجلي.
شيخه : لا والله إذا ماجبتي المبلغ كامل أخوي بيروح على طول يبلغ عليك.
نادره : ماله داعي التهديد.
شيخه تناظر ساعتها وقالت : بكيفك بعد شوي يوصل اخوي وبيتفاهم معاك.
شوي وأتت سيارة وتوقفت أمام البنات ونزل منها عبدالله ووقف أمام شيخه وقال : ها جابت فلوسك؟
شيخه وتبتسم بخبث : لا ما عطتني شي ولا همها إذا بنشتكي عليها.
عبدالله ينظر لشيهانه: لا معقوله شكلها ماهمنها يا بنت نحن مب لعبه معاك عشان تاخذي وماترجعي سامعه.
( لا تعلي صوتك لما تتكلم معاها) صوت شاهين بالخلف وهو يتقدم بتجاهم ونظر له عبدالله وقال: أوه شاهين بن صقر.
شاهين : هيه نعم شاهين يا العوبد أسلوبك ماتغير دوم فيك شوفت النفس.
عبدالله: شو دخلك بالموضوع؟
شاهين : الموضوع يخصني هاي اللي جالس تكلمها وتهدد تكون أختي.
عبدالله: أها أختك ، أنزين أختك ماتبي ترجع فلوس أختي وناصبه عليها بايعتها فساتين تعبانه.
( نحن مش نصابين يا العوبد) صوت باشق وهو يقترب منهم واستمر بالحديث: ولما تتكلم اوزن كلامك عدل والبنات الحمايل محد يكلمهم بهاي الأسلوب.
عبد الله: أوه باشق هنيه بعد شكله العايله مسيطرة على الكلية.
باشق : حضك الخايس إن نحن موجودين هنيه لأن نعرفك زين يالعوبد.
عبدالله: أنا أسمي عبدالله وأنا أطالب بحق أختي.
شاهين : أول شي الموضوع يخص البنات بين بعضهن بعض عيب عليك ريال طول عرض جاي تنازع بنات عيب خلي كلامك موجه معانا نحن.
باشق : ثاني شي مالك حق ترفع صوتك عليها أو على أي شخص دامه ماغلط عليك خليك محترم نفسك عشان نحن نحترمك.
شاهين يطلع ظرف من جيب كندورته ويمده حق شيهانه وأخذته شيهانه منه وقال شاهين : ثالثاً هاي فلوس أختك.
شيهانه تعطي الظرف لشيخه اللي كانت بموقف حرج وقالت لها : خذي هاي فلوسك ومثل ماعندك أخ تتحامي فيه أنا عندي إخوان يحرقون اللي يغلط علي.
شيخه بموقف لا تحسد عليه.
باشق : واللحين خالصين تبي شي ثاني العوبد.
عبدالله بغضب : شيخه ركبي السياره روحنا.
وانطلق عبدالله خارج الكلية.
شاهين وباشق ينظرون إلى شيهانه وهم يبتسمون لبعض.

يتبع…