الـــــــرد
الشاعر خالد ياسين شهلال / مستغانم / الجزائر
هاج غيضك و الغيت لصاحب المحبة
…..درت هدة بعد الشدة و هم لصحاب
ما تكيدك غلبة و لا سهم غتبة
…..بغير صحة و اكتاف التراس ينهاب
دير يدك فيدى نهدي ليك وجبة
……درت عاهد و اليوم كرمنى الوهاب
قريتلك الخطبة و افهمت ما تخب
…..ارميتها من جعبة و افهمنا التصواب
هزنى ذاك الدى و دارلى السبة.
…..جيت نعطيك الرد اشيخنا المرحاب
كل مخلوق على طبعه كى ترب
…العباد معادن و العياب ينعاب
ذاك هرتال و ذا عكلى او ذاك ثربة
…ذاك راضى هذا مغرور ذاك نصاب
هاكذاك الدنيا موصوفة بشعبة
……مسهلة فالحفرة و مدركا الزرداب
كل عاطش فيها تخزنلو القربة
…….تبيعله بالقطرة و تعلمه التوقاب
كان فض المكتوب اتعلمه الطلبة
…….تعود كلمة الله ينوب كى النشاب
سرابها ما روى ما ندى بزغبة
……كان صح اتكرم يمنيك بضباب
شراوا منها لامان و صدقوا الكذبة
…..ما اخذاوا نصيحة مالعراف للباب
سايروها و ارصاوا على كل عجبة
…..يكحلو للعمية و يعطرو المجراب
بالرخام يعلو و التزراب قصبة
.مشبحين الدخلة و الدار طين و تراب
كى البرنوس بلا سروال خو الجبة
…..ما انفع للسترة و لا كفى التنقاب
يتوزوا للمكفى و يلموا بزربة
…..كان حص احبيبة يجروا لكف طلاب
كراوا شيخة للصم او قووا الصخبة
….طريق لعمى بالضو اهدية لحباب
يرقصوا فالظلمة و يحموا الجدبة
…..كان ترقص انت قالوا قليل اداب
فارصوا فالنسوان و رضعوا الربة
…..ورثوهم او ولد الدار صار بواب
يبلغوا للكنة سر الدار كتبة
….و النسيب يزمل و يسقسوا اذا غاب
كان مات الشطاح يكبروا الندبة
…..و البريحة ترقى و يعزوه لركاب
يخبروا شق بحور و يكروا الركبة
……حتى و هودي و يقولو راه غير كى تاب
..كان مات النطاح يجوا غير قرب
…..و الغزا فالسترة و العزاى قهاب
حتى الطالب يجى ختلة بغير رغبة
…يعجلوا للردمة و يشبعوه تعقاب
ميبسين الجدرةو يشربوا الشطبة
….ما اثمر فرع بلا اصله زارعه خاب
يفلحوا فالحجرة و ابناو فوق خصبة
…ويح من قالولو داوى بشيبة غراب
يرقعوا فالخربة و يهدو الصلبة
…..حالة اللى مكسى طلبة عاش طباب
تقاتلو على المزود و شمعو المخبة
…حاسدين اللقاط على خريف لجناب
الشنا و الهيبة ملجدود كسبة
…..تنقطع فالسرة ما هو فتات ينصاب
ماتسومو حسبة و لا يجى بنسبة
….ما انتكل فى عقدة و لا بحرز و حجاب
واش كد الغابة نقصان عود حطبة
…ظلالها ما فرق بين شياه و ذياب
الجبل الراسى ما مال ما ادربى
…..ما يكدو ترباش الفار عاش خراب
واش كد النخلة نقار دار ثقبة
……دار عش و بيض و العرجون طياب.
كى تعاشر مريوح و سراق نوبة
….ايعيفك فالبقرة و مخبى الحلاب
كى اتامن اللى بانيها بلعبة
…..نهار فالزف و نهار يسامى المحراب
كى تكاتف من لا جرع هم غربة
….ما اعرف يحامى و لا صد ضراب
كى تحافى طماع اجنى كل خيبة
….قاس ماه يلا شاف الحال دار بسحاب
كبير كرشه يرهن عرشه بسوم حبة
…كى النباح على جوعه يعيش نهاب
يبات لاهث و لو يتعشى برقبة
……ساقها فى نيفه و الطلات فالباب
حتى ويرضع لبة يكبر ولد كلبة
….عيشته بالخطفة و التفكير بالناب
الحيا و النية عند الجواد رتبة
…..و العقل و الميزان من الكريم توهاب
كل ساخى داره تنزار كى القبة
….و البخيل جنانو مرتاع بوم و عقاب
و الشرير المخزى فى كل عيد نكبة
..و الغشيم يشهد على صداق كذاب
و المحصن الدا قسمة و دار عتبة.
….و المشيطن البس من العيوب ثياب
كل منعوت يموت بصفته الشهبة
…..كل محمود يعيش على شنا و ترحاب
حازنى بوعجبة ما طقت ليه هربة
…ما اقدرت انسول و لا ارضيت بجواب
حال منصوب يبات على نار شحبة
….بات يغلى فالغم و ما شاط ما طاب
ضاع وقتى و اتشبك كى خبال كبة
….ما اعبيت بشيبة حتى شيبها شاب
ذالعوايد كلخة ما افتاوها الودبة
…..ما ازهى بها حال و لا جات فى كتاب
هب ذالريح و ساط على كل رحبة
….اعماية هاذ الخلقة ميزها غاب
ا الغاطس فى بحر اسهاك فيق و اعبى.
..بعد نومك تلقاه الا اوهام و اسراب
ما اطلب الكاظم طلبة بعد غضبة
…..حتى يفرج كربه نعم الغنى التواب
من احلب شى حلبة يقضى الصلاح غصبة
كان يرجى فى تسوامه يبيع ترواب
كل ماهر اصطاد حتى بعود حطبة
…درك فى قنباصه و اذا يكون صواب
شيخ من شيخ ارعى و الدا خمير وهبة
كل من طار بلا ترباص فى وطى عاب
ا الكندوز اقرى شوفة فكل ضربة
….كل غيضة تخرج من الشيخ مشهاب
كان يعثر الشيخ تعاوضو الهيبة
……حرمته فى قوله و عنايته القصاب
كان يعثر العود تعاوضو الوثبة
……قوته من اصله و اعنايته التجلاب
من اشلال حواضى هاذ القصيد شربة
…هاكذاك الملهوم يصب وقت ما ذاب
صغتها للناظم على بوغريبة.
……ما تهزوا لكدار و لا زور طلاب
اتواتى اسمه و الجد بن ذهيبة
…….بن عبدالقادر شيخى ذامن الاب
خوذ وردة شيخى و اعطينى الجعبة
….زاهرة مرقومة لمها فصيح ركاب
ما اخطيت الجرة درت البا مع البا
….ذى شروط الكندوز اذا بغا التدراب
من اخيار الكلمات اسمى حروف جبى
…فك لغزه و اقرى تلقاه خير للقاب
خوذ ما فالنسخة و اظهر وسط نخبة
….و ما كمل به لعقل و زيد دال لهداب
خوذ مالشمس اللى نابت وسط عشبة..
..زيد ردف هلال و ليك تم لحساب
يا الله ارحمنا و ارحم كل صحبة
……و كل شاعر ارضاو عليه ذوك لرقاب
غيثنا و اعفينا من شر كل عقبة
……دير امرك احجاب يكون خير تزراب
و اصلا و السلام على نور طيبة
…..بورقية طاها تم الحساب بكتاب
ديرنا ليه اجوار و انجاورو الكعبة
…….غيثنا بنوارو و بخير كل ما جاب
