حلاوة الذكريات

✍️ د. منال شنودة :

بيقولوا في المثل ( من فات قديمة تاه)
وعلشان منتوهش لازم دايما ندور علي القديم اللي في حياتنا ..
ذكرياتنا من أيام الطفوله مرورا بمراحل المراهقه والدراسه والجامعه .. اول حب .. الاهل وتربيتهم .. الأصدقاء .. وكل اللى متخزن من ذكريات في عقولنا
وكان له أثر إيجابي في حياتنا ..

يعني ذكرياتنا في الطفوله ولمه الاهل فى المناسبات
اللعب مع أصدقاء الطفوله وخصوصا الاقاريب منهم
ومنهم اللي فضل عزيز علينا للان ومنهم اللي رحل ومنهم مقدرناش نكمل معاه لحاجات معينه

أيام الفيونكات بقي وايام الدراسه والجامعه طبعا بتكون من اجمل الايام اللى دايما بتكون بأرشيف الذكريات المهم لأن أحداثها بتكون كتيرة جدا ..
يعني مثلا الفترة تحديدا بتكون فيها تكوين صداقات
تتسم بالمحبه والود الزائد .. كمان عادة بيمر من خلالها أول حب .. واول لقاء .. واول الاحلام بفارس الأحلام .. الفترة دى بنبدا نرسم فيها أحلامنا وطموحنا .. ازاى هنخطط للمستقبل .. الحياة العمليه والبيت والأسرة .. أحلام كتير بتمر لكن في اللى حققناه وفي منها اللى عكس خط السير معانا

الذكريات .. حياة بعث اخر للنفس مع الكبر في السن ومع مرور السنين .. شريط بنستمتع لما نرجع لمشاهدة مع الوقت وخصوصا بعد ما تتجوز الولاد وتلاقي الواحد فينا بقي لوحدة ماسك كتابه وبيستنى رنه تليفون من حبيب او قريب او صاحب

ذكرياتنا منقدرش ننساها لا فى رمضان مثلا مع ضربه المدفع او في الأعياد وإحنا بنجري نشوف ونعيد على بعض ولا لما حتى مقابل جار في البيت القديم صدفه .. الذكريات .. حياة .. وحلاوة الذكريات إستحاله تغير طعمها مرارة الأيام وضغوط الحياة مهما مر العمر او زادت أحمال الحياة

إسعدوا نفسكم ودوروا علي ذكرياتكم علشان ذكرياتنا هى ميمورى جمال حياتنا اللى شايل لينا بعض لحظات السعادة .. وهى دى حلاوة الذكريات