يا مالك القلوب يا رسول الله
الشاعر أحمد سفاسفة / تيارت / الجزائر
يامالك القلوب بحبك يا خاتم الرسال
بشوقي فنيت صبري ورياح الحب ثايرة
ياصاحب الخصايل يا طلعت بدر فالكمال
والبدر صورتو من نورك ولات نايرة
ياوارم القدم بقيامك ياناجد الغزال
جبار للخواطر و الأمة بيك جابرة
رَحيم بالخلايق ماتنهر عبد ليك سال
رَؤوف باليتامى ليّن زين المعاشرة
رديت للطريق الجافي والقاطع الوصال
وكريم ولد كرمة سامحت عباد غادرة
طلبي صغير عندك وعليا صاعب المنال
حلمي نصير جالس ما بين يدين طاهرة
مجدوب جاي صوبك ضامي و يلحْ فالسوال
مالو سبيل والا حيلة جنحيه قاصرة
يامن سقات عين صباعك لصحاب بالفضال
شاهي تغيثني بشراب اللقيا الفاخرة
عيني تقارعك في نومي من دهر ذا شحال
وعواطفي بكثر سوالي مزال حايرة
وقتاش ياعيوني تتلاقي صاحب البطال
راها حمال سيلك صارت ع الخد جايرة
وقتاش ياحبيبي تلغى وتقول لي تعال
كبدي بحال كبد الصديق بشوق فايرة
راها غزاتني ياسيدي بالشوق ذالهوال
كبدة مشوقة للملقى ماهيش صابرة
عمري بدون شوفك ليلة و دماسها طوال
روحي هوات فالمتناصف مزال ناطرة
لوكان كيف بكري نصفالك عازم الرحال
يا شارق الخدود الخطرة ولات عاسرة
حسراه وين ذيك الرحلة والسير بالجمال
راها اليوم عدمت وركاب الحج طايرة
وانا فقير باقي يرعى بالعين في الرجال
هاذي ركاب حطت لخرى من غد خاطرة
وانا لدالتي نستنى وضياقت الحوال
والشوق للمحان يرادف وضحات كاسرة
وردي بدون اسمك ما يبدي مايجيب فال
حتى تكون فيه صلاتك مشروط حاضرة
دعوة بدون ذكرك ظني ماهيش في القبال
واللي تجارتو في غيرك معلوم خاسرة
سعدو اللي هدالك قلبو هاذاك واه نال
صفقة مباركة مربوحة ماهيش بايرة
انت الي هديت لجاهل لكنوز و الاموال
كي شاف بين. جبلين غنم كثير سايرة
مدهوش في سخاك تْروّع ماصابلو مثال
هاذ الرسول ماهو خايف للفقر دايرة
لوكان راد يغنى لكنوز تجيه بالجبال
تبقى عيون قوم الكفرة بالحسد غايرة
سيدي قنوع غاني بمحبة خالقي تعال
داري بكل نفس تولدت ضيفة و زايرة
وجميع شمس تشرق ياتيها وقت للزوال
ماغير شمس سيدي باقي في الكون زاهرة
شمس النبي اللي كسّر بيها ظلمة الجهال
من يوم جاه أمر المولى مازال نايرة
شُعلة بقات من يد ليد قرون بالدوال
أمانة النبي محظية برجال غايرة
صلى عليك ربي يا خير الخلق والرسال
وعلى الأل جملة بعداد فلاك سايرة
