عزة نفس
الشاعر رشيد بومعزة / ميلة / الجزائر
مزالني راجل بعهودي وافي
ميزاني فالكيل ماهوشي طفاف
ومزالني شاعر ننظم لقوافي
و عودي مزال يصهل في لعطاف
ومزال كلامي كي النبع الصافي
ومازالني عربي من خيار الاشراف
ومزال نحكي على موروث سلافي
ونايا بدوي مأصل من لرياف
ما يهمني من كان فالشكل خلافي
في الوفا والدين في الطبع ولعراف
في صحرة وتلول مابين فيافي
وحدي نا والعود مانيشي خواف
بعقل الحكيم لسراري خافي
نا مول الخصلات والمقصود اهداف
وقت الشدة ياك بالسيف نكافي
والبدوي معروف متربي سياف
لناس المعروف نبسط لحافي
ولجملة لحباب و اللمة لهاف
ومزالني للود منيشي جافي
للقاصد عندي من الكرم أضعاف
داري مفتوحة لجميع اضيافي
لبن وكسرة في الصباح مع لخفاف
كانوني ڨادي ما هوشي طافي
وفي مراحي خرفان محسوبة لضياف
نرحب بالضيف كي يجيني حافي
وغداهم موجود مافيهش خلاف
شخشوخة ولحم وطعامي كافي
نذبحلو لخيار والمطعم اصناف
ما زالني في الخير تتعد أوصافي
رمز الرجلة هازينو عل لكتاف
