الخمسة جويلية
الشاعر طيور أحمد / سيدي بلعباس / الجزائر
هاذ الخمسة جويلية ذكرت لبطال
ذكرت شعب فنى على ذالقضية
ذكرت شعب فدى الروح وزاد المال
من الثمنمية والف زيد البقية
ستالم ذالشعب كذا من مشعال
جيل يكمل جيل وذكرى حية
ومزالنا متعاهدين نسا ورجال
ونبنوها بفكار جزائرية
وتطهر من كل غشاش ومحتال
ولخاين خليه تفظحه هي
كذا من عميل بان عليه الحال
والجزائر قارة ماشي قرية
ومشي رقعة يسيرو فيها لرذال
ثروتنا شباب وكهول قوية
شوهادا حيين يتخطو لهوال
ضحاو باتنا على ذي القضية
وخلصناها بالمثني رد البال
ومازلنا نتجندو لتضحية
يدك ويدي نريبو بيها لجبال
وطنك ياشباب تبنيه نتايا
وتتعلم فيه لخصايل ونضال
تبنيله صور لمحبة بعناية
وتتحزم تحميه من كل حتلال
نتعاهد متجيش طاعن مورايا
ولم شملنا بيه نصنع لموحال
كي توصل للعنڨ نلقاك حذايا
جزائري مايكودك بعد الحال
هذا وطنك ماكش خديم هنايا
والمليون نص كاتبلك مقال
كتبوها بدم نصخة ثورية
مافيها جنوب خير من شمال
لاغرب على شرق لا جهوية
جيش وشعب تضفرو تضفار حبال
كلمة خاوة الاصل هي ثورية
مايقطعنا موس ولافاتن دجال
لامملكة عدنا لا حاشية
تاريخ بلادي نغطي بيه جبال
ونفرش بلادكم وطية وطية
ذا ورث الاجداد يبقى للاجيال
ماتمحيه يدين تحت الرعاية
هذا ماشي فيلم مبني ملخيال
ولاقصة حب ولا رواية
هاذي سبع سنين تعذيب وقتال
ماجازر فيها تشوف حتى الصبيا
طيارة لميڨ تقصف بالنبال
وفرايس مع لحلايس مرمية
وعجايز وشيوخ ماليهم دلال
دفنوهم حيين في بعض لخبية
قيم ياشباب هذا الاستقلال
كم دفعنا على سمه من ضحية
ومزالت ماروات من دم الابطال
وماننسو واش صابنا فلعشرية
واليوم الجهاد هو في العمال
كيما كتبوهلنا فالوصية
نتحاد وندير نيف تاع رجال
ورايس مايكون غي برعية
ونتعذر يذا حديثي عنكم طال
وصلاة على احمد اب رقية
