حال الزوالي
الشاعر يوسف كرعي
افلو ولاية الأغواط / الجزائر
بلفرحة جانا الشهر المعظم
راقت ليه نفوسنا وفرحنا بيه
وفي شهر التوبة لعوجة تتسڨم
والعاصي يليان مولانا يهديه
في حرمو قلنا معاه الخير يعم
تتراحم لعباد ولمارد تخزيه
لكن شفت الهم فوقو زاد الهم
وفوق الهم هموم همك يسبح فيه
شفت العلم خصوص والجهل تعمم
ولي تظن تأيدو تلقاه سفيه
كيما شفت عباد ربي يهديهم
ما رحموا فقيرهم ما سالوا فيه
لا حرمة رمضان لتاجر يرحم
لا غاني زكى المال وفرج بيه
لا جار على الجار سول وتكرم
وحليل المسكين ماذا يصرا فيه
مقواها لعباد عياها ذلهم
في ذا لوقت لي العاقل حاير فيه
عيطة مثلي داخلة بحر مظلم
وكم من واحد بالشقى عرقو كسيه
قلت نروح اليوم ونوب عليهم
باش نشوف السوق هذاوماليه
نلقاها متناوبا كاس العلقم
سمو قاطع لايضوق مسلم فيه
رحمة ربي كاينة ديما في الفم
وعند لبوشي شفتها ڨفات لهيه
ماتشكرش اصاحبي في ذالموسم
حار بنادم في عشاه منين يجيه
شتڨنا نتفى لحم في وقت وحم
ولوما وحم صيامنا ما سلت عليه
وماني ضاري بلحم ما نتوحم
ياك الصائم غ ليجات تشهيه
قالو لحم اسبانيا رآه معرم
قلت أنا لعيال ذا لعام نزهيه
هاساعة ولييت ع لقول مندم
ولي سلتو قال متحلمشي بيه
عند لبوشي صفوف بدز تزاحم
والزوالي يستبن غير بعينيه
ساميتو وبغيت زعمة نتبسم
نرفع راسي مرة ومرات نطاطيه
ونخرص بلعين وشوق تلايم
لمحة عيني صاڨ وڨصير مساميه
وظلوعو متخالفة لحمة وشحم
شڨ الظلعة طرف عيني راقت ليه
شايعتو بلعين وبقيت نحمحم
زوالي في حالتي ماني ساويه
باين لحم خروف مهوش مشحم
ماوفاش لحول خصو شهر عليه
ضاق عليا الحال ولغزل تصرصم
ونصبر في خاطري ونشايع ليه
حدثت نفسي حديث لي يفهم
ماعندي مدخول لباش نكرديه
وادعتو ورجعت للبيت مدركم
نتمحمح في خاطري ماني نسيه
.قلتلها ماكيش وحدك في ذا الهم
راها نص الخلق عاشت تحلم بيه
استغفرت وعدت ع لفعل مندم
هذا معطى الله وبنادم خاطيه
زيد استغفر يالعاقل لا توهم
والطمع. في خالقك والشدة فيه
هذي هي حكايتي ونت خمم
دير حسابك يا لعاقل كون انبيه
مانا مخصوصين مانا نتوحم
ما هو فاضل كي لبعض نلحو فيه
بلحارة شفتو لزوالي يحشم
وحذاه لشبعان ماهو داري بيه
هباه نردو الجلدة ع الدم
ويريح فقيرنا نتهلو فيه
وستغفير الله مولانا يرحم
وسيع الرحمة لبارع في كونيه
وصلاة على نابي وسلم
والف سلام على لماحي واليه….
