العين و النفس الامارة
الشاعر دحو منصور مهدي _ قصر الشلالة / الجزائر
ما فيا من عيب ياعيني يكفيك
واش اداك اتنبشي في عيب الناس
انتيا والنفس وابليس يوريك
ايلوحك في بير ماعندوش الساس
علاه تروحي للمعاصي خفت عليك
وعمرك كل يوم رايح للنِقاص
من بعد الحياة المنية تاتيك
يامعتاه انهار غير الكفن لباس
تتخالص لعباد مافيها تشكيك
امام الإله محكوم ورياس
يحضر فعلك كلشي مرشوم عليك
وجلدك ينطق ماخفى عن عين الناس
جنة ولا نار ياويحك هذيك
ياويحك بالويح من يوم القصاص
يانفسي ياهاملة ربي يهديك
ترمي فيا للوعر شور التهراس
غرك صغرك للبلى كان امدربيك
والصحة والمال والراي الفلاَس
ورفايق للغالطة ياك توريك
وانتي ليهم طايعة ماتقولي باس
واللي نصحك ذاك درتيه امعاديك
تتلاحي للعانفة وتعظي الفاس
ديما غير تجَلبي شور ابلاويك
صدقتي ذاك الربيع مع لعراس
ظنيتيه يدوم محال ويخطيك
والدايم يا جاهلة ملك الناس
تعمى عينك عالصواب بلا تشكيك
وتديري فالرادية يوم المرداس
يانفسي يا لايحتني فالتهليك
شربتيني مالندم قداش ن كاس
وتعودي ديما لرايك ماذابيك
الراي التالف لايحك شور التهواس
أمارة بالسوء ذا قول المليك
ويكت يا عذابتي يهنى ذالراس
ويكت يا عذابتي يهنى ذالراس
