بهو فندق

✍ محمد الثوعي :

احيان اقول اني معك مثل ظلك
………….واحيان اشوفك ظل دايم تبعنا

اقرب من الانفاس عطرك وفلك
………….وابعد من الاحزان حب ٍ جمعنا

اظماك واشرب ياحياتي واعلك
………….من. منهلك. شهد. المحبه ولعنا!

لو كنت غايب في غيابك أدلك
………….ترحل وتبقى داخل القلب معنا!

هرجك دواء للنفس واللي يملك
…………..ماله فكر واحساس مافيك يعنا!

اعرف تفاصيلك واحبك واجلك
…………..من بعد رحلة حظنا من رفعنا!

في دولة الأجناب ماهي محلك
………….ولاهي محلي والحياء من منعنا

من دار واحد واضح ٍ من سجلك
………….اغراب ماحدٍ فالمدينه نفعنا!

شفتك وحيد وتنتظر من يقلك
………….في بهو فندق بعدها ما انقطعنا

رفعت قدرك فالخطأ ما استزلك
…………..واليوم حنا للوطن قد رجعنا!

ساعة وداعك منشطر قلب خلك
………….عيني في عينك والمدامع وجعنا!

لوقلت كلي يتبعك وانت كلك
………….بالقلب حاضر لكن اليوم ضعنا