لا تلف بي :

✍ حسن القحل :

وين الكلام اللي من أول تقوله
وين الحكي والهمس وين المشاعر

أشوف روحك بالمشاعر بخيله
واشوف فيك الفرق غايب وحاضر

عيشتني حلمٍ ولا أقدر اطوله
مثل السراب اللي بعين المسافر

عطني الصراحه دون زيفٍ وميله
لا تلف بي .. وتدور .. لا لا تكابر

بتبادل إحساسي بحبٍ مثيله
والا كفانا كذب ما دمت .. ناكر

دام الجمايل في عيونك قليله
والحب عندك كذب واحساس عابر

لا تلوم مجبورٍ بيعلن رحيله
ذاق الألم والآه .. أول … وآخر

فك المعنى واعتقه في سبيله
واطوي الحكايه من قريبٍ وقاصر