صورنا يا عكاس
✍روابي البناي :
صبحكم الله بالخير يا مواطني وطن النهار، صباح السعادة والحب والعافية اللي عساها ما تفارقكم، اليوم يا محفوظين السلامة كلكم بلا استثناء ابيكم تكشخون ومو أي كشخه ، ابيكم اتييبون اليهده بالكشخه ادري انكم مو مقصرين من هالناحيه وما تحتاجون احد يوصيكم ولا يطلب منكم ، بس اليوم ابيكم اتزيدون الجيله ثلاث حبات علشان نبي نرتز كلنا واقصد كلنا احنا الشعب الكويتي الآبي اللي يعرفون عمرهم عدل الشعب الكويتي اللي ما عنده بيع برد ، وما يقول بطني تعورني ولا قام اكل وقام اقعد وغيرها من القامات والأكيد المؤكد انه كلمة فديتك ما تدور بقامومسه ، جدام العكاس وانصور سيلفي جماعي .
ادري الحين اعوية الحلج عند البعض والابتسامة الصفرة والتطنز والتحلطم بيزيدون وبتقولون نعم روابي عسا ماشر ؟ بقول لكم calm down حبايبي ليش يايين كلكم ، هدوا اشوي ، شنو اليديد لما اقول لكم خل نرتز وانصور سيلفى كلنا ، مو هذا اللي احنا شاطرين ومبدعين فيه ؟ مو هذا اللي احنا يطلع فينا يني اذا ما سويناه باليوم امية مره ؟ مو هذا اللي اول ما انبطل عينونه من النوم انسويه علشان انقول morning people على اساس ان احنا وايد مهمين والعالم كله ناطر قومتنا من النوم وناطرين يكحلون عيونهم بطلتنا البهيه ، مو هذا اللي ابطونه اعيزت واهي اتعوي اتقول عتاوية امصده كلها اتعفر داخلها وتستغيث من اليوع واحنا حاقرينها بس علشان انصور الاكل والصحون والقفاش وانقول Yummy Yummy ، مو هذا اللي احنا انتعمد انسويه لما نشتري اسوار يديد ولا جنطه يديده ولا قلب يديد ونبي نقول حق الله وخلقه ترا شرينه وترا عندنا ؟ مو هذا اللى انسويه لما نطلع نتعشا ولا نتغدا بدون لا نقول حق سباجه وعواشه ونصور واحنا مادين البوز وشافطين الكرشه بس علشان نبي انحرهم ونبط مرارتهم ؟
بس انا اليوم ابيكم ترتزون جدام العكاس موعلشان اكله ولا ساعه ولا خاتم ولا بوز ممدود وغيرها من الامور التافهه ، ابي انصور سيلفى جماعي علشان نبقق عيونه ونبحلق بالصورة عدل ونبدي نحاسب عمرنا وانا قبلكم ، علشان يمكن عل و عسا لما نطالع روحنا نستحى على ويوهنا ونقول احنا اشقاعد نسوي ؟ علشان لما نشوف ويوهنا بالصورة نتذكر ان احنا عيال اوادم وان احنا ننتمى لديرة ما مثلها ديرة على قولة الغائب الحاضر خالد العبد الجليل الله يذكره بالخير ، علشان نحاسب عمرنا يمكن عل وعسا بمرة ملك ربي يستجيب واتيينا الشجاعه الكافية ونعترف ان الغلط فينا احنا وراكبنا من ساسنا ليمن كرياسنا.
بتقولون اشلون ؟ انا أقول لكم …
خلونا انتمقل بالصورة الجماعية اللي خذاها العكاس لنا ونشوف نفسنا ونشوف حوالينا ، منهو اللي وصل الهيلق والمرتزقه واراجوزات السوشيال ميديا للمرحلة اللي اهم فيها الحين غيرنا ؟ منهو اللي عطا فشيلستات السوشيال ميديا أمهات براطم اللي كأنها دجة دكان عقاب اللي بالمرقاب قبل غيرنا ؟ منهو اللي ساهم بانتشارهم وخلاهم يدشون بيوتنا ويصيرون محور يمعاتنا وسوالفنا غيرنا ؟ ومنهو اللي خلا بعض عيالنا ورياييلنا يراكضون وراهم ويصيرون مثل خرفان العيد لهم غيرنا ؟
فاليوم اذا لقيتوا هالنماين من مرتزقة السناب وارجوزات التيك توك وبلاعين البيزة من فشلة السوشيال ميديا سووا مصايب وذبحوا عيالنا بدم بارد ، ونخروا بالمجتمع دمار سواء بالمخدرات ولا السلوكيات اللي عمرنا ما عرفناها ولا أهلنا ربونا عليها من تفصخ وتنهوص وشفتوا اكبرها واسمنها بموت علشان يتوسط لهم ويدافع عنهم لا تستنكرون ولا تستغربون لأن احنا اللي ساهمنا وخليناهم يصيرون شى واهم بالأصل ولا شى .
يمكن وايد منكم بيكرهني عقب هالكلام بس ماعليه بتكرهوني اليوم وبتردون اتحبوني باجر لأنكم شعب وايد طيب وايد حنون وايد عاطفي علشان جذي انا امون عليكم وكلامي لكم اليوم طالع من اليوف لليوف وادري انه راح يوصل وادري انكم راح تتقبلونه ، ما ابي اطول عليكم ويالله الحين تعدلوا وتسمتوا علشان العكاس يصورنا ..
