يا من صاب حكيم
شعر شعبي جزائري
بقلم الشاعر جمال جلالي _ الجزائر
اتمعن يــا صاحبي وفهـــم معانيه
اذا كونت نبيــــه تفهم مـــا بيا
وخيك مهمــوم ذاق الحــال عليه
الدنيا من شاوها ما تسوى حيا
يا من صاب حكيم للقلـب يداويه
شكوانا لله و مــــا العبـد شفايا
غايضني يا شيخ وقت لحقنا ليه
فط القلب قريب تلفـــت سمايا
شاش الهمة ضاع بيـن هنا و لهيه
البايــــع ختـــال و شــاري نية
ذالوقت المحيور لا مــن داري بيه
حتى الارض الواطية رجعت كديا
و الفيض لي كان عشبو زاهي بيه
خزز نبعو فـــاح نشفــت الوديا
و الغيم لي كـــان زحزح صد لهيه
اتكشفت وجــوه كانت مخفية
و الليث لي كان صوتو يرعب بيه
زدمولـــو لكــلاب بنبــاح قوية
و الساف لي كـــان حوام بجنحيه
ولــد الهامـة قال ذا اصلي نايا
و العود لــــي كـان البارود مزهيه
تكلملو لبهيم منين جيت انتيا
اتخبلــو لخيــوط واش تْفَهم فيه
سايسني يــا شيخ خبي مغزايا
ارض السبخة قال لا تحرثش فيه
اتحرثت و نبوتها !!! ما نبتت حيا
ساس الرملة ياك مـــا تبنيش عليه
بنيانو مهـدوم لـــو تبني عَلَايا
و سامحني يا شيخ مقصودي تدريه
و عذرني يــا شيخ زودت شكايا
لا جينـــا منـــا و لا جينــــا منهيه
نبهني يـــا شيــخ فتـــح عينيا
ما نقصد من كان مرضي والديه
و لا الناس الصلاح اهل الديرايا
و لا نقصد من كان علمو رافع بيه
يفقه فــي المنزول يفسر الاية
و عذرني يــا شيـخ نختم قوافيه
و نستغفر و نتوب للعالي مولايا
و نصلي ع الرســول محمــد نبيه
صلى الله عليه صبحة و عشية
