بالمصري الفصيح.. رسالة قارئ للشباب

حبايبي الغاليين عاوز اتكلم معاكم انهارده في موضوع مهم جدا جدا .
اولا انا مليش اي توجه سياسي او ديني او غيره انا مصري مسلم بحب بلدي مش اكتر من كدة.
…
عاوز انصح نفسي وكل المصريين بكام حاجة هيفرقو جدا في حياتنا وحياة كل المصريين واولادنا واولاد اولادنا .
اولا : الاستهلاك .. اي حاجة تقدر تستغنى عنها في حياتك الفترة دي استغنى عنها .
استخدم كل حاجة اقل من المعتاد يعني على قدك او اقل
سواء مياة او كهربا او غاز او سجاير او شاي او قهوة او اكل او اي حاجة بتستهلكها في حياتك اليومية .
الموضوع يبان صغير اوي بس صدقوني ده هيفرق في حياتنا جدا والله .
تخيلو لو كل بيت قلل استهلاكة اليومي واستخدم على قده بالظبط ومرماش حاجة او استخدم فوق احتياجة .
اقسم بالله هيبقى عندنا فائض ف الرز والسكر والدقيق وغيره وغيره الأزمات كلها في مصر هتنتهي لو وقفنا مع بعض وقدرنا نعدي الفترة الصعبة دي من غير ترفيه او بذخ او استهلاك زائد .
صدقوني لو عملنا كدة بمزاجنا هيبقى افضل مليون مرة من انه يحصل مجاعة لا قدر الله .
والرسول صل الله عليه وسلم قال كدة قبل ١٤٠٠ سنة
((ما ملأ ابن آدم وعاء شراً من بطنه، بحسب ابن آدم لقيمات يقمن صلبه، فإن كان لابد فاعلاً فثلث لطعامه وثلث لشرابه وثلث لنفسه)) …
….
كل حبة رز او قطعة خبز او حفنة من المياة بترميهم او بتستخدمهم من غير حاجة صدقني هتتحاسب عليهم قدام ربنا لان فيه غيرك محتاجهم انت مش شايفة ممكن يبقى ابنك بعدين وممكن يبقى حد في الصومال او اي بلد فقيرة .
….
كل الازمات اللى في مصر سببها استهلاكنا الزائد وتفكيرنا في نفسنا بس .
..
….
……
ثانيا : الدولار او السلع المستوردة .
نفس الامر اللي في الاكل و الشرب
اي سلعة مش محتاجها كاستخدام اساسي في حياتك
سواء عربية او موبايل او كمبيوتر او بلايستيشن وغيره وغيره . تقدر تستغنى عنها متجبهاش نهائي
اما لو حياتك واقفة عليها هاتها .
لان الحجات دي بتيجي بالعملات الاجنبية بالتالي بتزود الطلب عالعملات . يعني لو مغيرناش عربيات ٥ سنين مثلا هنوفر اد ايه من الدولار؟؟ كتييييير جدا .
بالتالي الدولار هيقل الطلب عليه خالص وهيبقى فيه فائض هنقدر نجيب بيه الاساسيات الناقصة في الدولة
وكمان سعره هينزل جدا جدا لان مفيش طلب .كمان السوق السودا مش هتبقى موجودة وده اللى احنا عاوزينه .
…
حاجة مهمة جدا..
الناس اللي شايله او محوله فلوسها لدولار عشان تحافظ على قيمة الفلوس انت كدة مش بتحافظ عالفلوس انت كدة بتخلق ازمة كبيرة اوي وانت مش حاسس انت كدة بتاخد الدولار اللي الدولة والمستوردين شغالين بيه عشان تركنة .
فكدة انتو عملتو أزمة كبيرة اوي ورفعتو من قيمة الدولار وقللتو الدولار اللي في البلد عشان مصلحتكم الشخصية ايه اللي هيحصل بعدها الدولار هيقل واللي عاوز مش هيلاقي فالسوق السودا هتشتغل الله ينور والدولار هيزيد كل يوم .
انت فرحان ان فلوسك بتزيد بس مش حاسس انك عملت أزمة للبلد كلها والبلد فى امس الحاجة للدولار عشان تغطي المطلوب.
فياريت اى حد شايل دولار ولو دولار واحد يبدله بالمصري ويزود الدولار ف البنوك والمعروض يزيد والطلب يقل والدولار ينزل وهينزل جدا والله . ولو خايف على فلوسك حطها ف عقار او تاجر بيها وافتح بيوت ناس تاكل من وراك عيش متفرحش بركنة الدولارات وانت بتخلق ازمة كبيرة اوي انت مش حاسس بيها .
لان الدولة لو غرقت مش هينفعك دولاراتك ولا هتنفع عيالك وعيال عيالك .
صدقوني الحل في ايدينا كلنا
ومحدش يقولي الدولة بتعمل ايه .
لا يغير الله ما بقوم حتى يغيرو ما بانفسهم
لو احنا ثقافتنا متغيرتش زي الدول اللي نجحت وعدت الازمات الصعبة مفيش حكومة تقدر تحلها .
لازم الناس كلها تتكاتف وتفكر ف مستقبل مصر .
بلاش استهلاك زائد
بلاش لا مبالاه ولوم الحكومة وننسى نلوم نفسنا
بلاش ادخار دولار وعمل أزمة
…
الكلام كتير شوية بس مهم جدا والله
ياريت اللي يعدي عليه البوست يطبقه بالله عليكم
وانشر البوست ربما يكون سبب اننا نعدي الأزمة الحالية ومصر تبقى احسن دولة ف الدنيا ان شاء الله.
حفظ الله مصر أرضا وشعبا وحكومة وجيشا.