بيضا برج سحاب في العلالي

جزائر باهية شمس الحرية

بيضا برج سحاب ف العلالي

ارض طاهرة بالأحمر مسقية

دم الشـهداء مـدة و ليالـي

إلي باع وطنـوا للـروميـة

ولي ضحى للـوطـن الغالـي

رجال بالمرصاد مدارت فيا

و الاستقلال وردة تحلالـي

غرة نوفمبر المرداف حربية

صحاب الثورة لـعلام العالي

نتأمل التل الصحرا المنسية

متخالف نوارها فالمرسم خالي

نتأمل بوكحيل رمز الباديـة

إلي شاع اسموا كيف الوالـي

الطالب عبد الرحمان نشومية

نجمـة وهلال لـول و التالـي

وطني وطني فرحة و زهوية

رمز الافتخار واقف برجالـي

خضرا و بيضا الروح مرضية

لحمر للـشهيد الرايـة تشالـي

ضاقت روحي مـن هاذ الدنيا

يهرب عني النوم يجافي نجالي

كفاش طفل صغير حمل قضية

شبـاب اليـوم خسـر أهـالـي

ياحسرا على زمان على القصية

الله يرحم ناس رفعت أمـالـي

خديجة سويفي بنتـك صبيـة

مـن سيدي خالد وطني جلالـي