بين الشموع

بين الشموع
الفصل التاسع عشر
بقلم *سميرالشحيمي

بعد عام كامل من زواج شمعه من مبارك الساعه 2 الظهر تنزل شمعه من السياره اللي رجعتها من المدرسة وتدخل بيتها بيت مبارك الصايغ تحط شنطتها تناديها أم مبارك : شمعه وصلتي؟
شمعه تبوس راس أم مبارك: أيوه وصلت
أم مبارك :أنزين روحي جهزي الغدا على الطاوله ماباقي شي ويوصل مبارك
شمعه : بس توني واصله من المدرسة تعبانه وين الخدامه أو بدريه؟
أم مبارك : الخدامه كان عندها شغل وايد ومن خلصت خليتها تروح تنام وأما بدريه محد فبيت أهلها راح ترجع اليوم بليل
شمعه : إن شاء الله عمتي اللحين بسير أحط الغدا
أم مبارك : أيوه سيري خلي عنج الدلع بنت رقيه دراسه وخليناج تكمليها من طيب خاطر وبعدج ماتبي تخدمي على زوجك
راحت شمعه المطبخ وهيه مكسورة الخاطر وتعبانه من يوم دراسي طويل جهزت سفرة الأكل ووصل مبارك البيت ودخل بدل ملابسه وراح يتغدا
وفي بيت سلطان بالمجلس جالس مع أخوه خميس وياسر
سلطان: كيف الزواج معاك يا معرسنا الجديد؟
ياسر: والله عال العال مرتاح
سلطان : الله يتمم عليك فرحتك الغالي
خميس: لازم بتكون مرتاح بيت ملك طابقين وزوجه تشتغل مهندسه وسياره حليوه
ياسر: أعوذ بالله من الحسد
خميس :لا تخاف على نفسك مني عيوني بارده
سلطان : ربي يباركلك برزقك ويسعدك يا خوي يا ياسر
وفي بيت الجده صبيحه كانت جلسة حريم العصريه متواجدات حريم الحاره وبنات الجده صبيحه
الجده صبيحه: زارتنا البركة تفضلن الفواله جدامكن
وحده من الحريم :يزيد فضلج رقيه أخبارج وأخبار بنتج شمعه ؟
رقيه: الحمدالله ربي يسعدها ويسهل أمرها
الحرمه :الله يكون بعونها كيف تزوجت ريال كبر أبوها كيف وافقتوا عليه؟
رقيه: هاي أرزاق وقسمه ونصيب بهاي الحياه
الحرمه:أيوه أعرف بس عاد مالقيتوا تزوجوا غير بنتكم الصغيره حقه كان أولى فيه بنتج عايشه
الجده صبيحه: إنتي جايه تتقهوي وناخذ أعلوم بعض ولا جايه تحققي؟
الحرمه: أنا آسفه والله ما قصدي شي يا صبيحه بس أنا أحاتيها كيف تكون عايشه مع أم مبارك وهيه حرمه متسلطه
الجده صبيحه: محد طلب منك تحاتي بدل عن أهلها شربي قهوتج الله يحفظج
رقيه أطالع أمها صبيحه بغصه وضيجه على حال بنتها
وفي بيت مبارك وهو بغرفته مع بدريه توها راجعه من الداخليه
مبارك : ياما نور البيت وبراعييته
بدريه: لا والله كلها يوم بس وصار البيت مظلم يعني معاك حبيبة القلب شمعوه
مبارك : أنتي الساس شو بعدج تغارين منها
بدريه : قص علي بكلمتين
مبارك : اليوم دورك تضيفيني بغرفتك؟
بدريه: أسمع حابه أقولك قرار أتخذته
مبارك : شو هو قرارك أهم شي مايكون الطلاق لأن من اللحينه أنا مب موافق
بدريه: أريد أنتقل أسكن بمسقط
مبارك:نعم ليش إن شاء الله؟
بدريه: أكون قريبه من بناتي وبعد طلعت لي وظيفة وتم قبولي بشركة
مبارك : أنا خبرتك قبل ماتحتاجين لوظيفه بس بعدج سويتي اللي براسج وكملتي تسجيلك وتقدمتي للوظيفه
بدريه: عشت خدامه حقك وحق أمك وأعيالك برغم أنا خريجة جامعيه بس خليت البيت والزواج والأعيال أولى أولوياتي بس من بعد زواجك علي فلأفضل أشوف مستقبلي وكلمة أخوي وكلم معارفه وتم قبولي
مبارك: يالله زين بفكر وبردلك خبر
بدريه : انا أعطيك خبر بقرار أتخذته ماجايه أشاورك
مبارك : أنزين خلاص يصير خير بفكر
وفي غرفة شمعه توها داخله الغرفه وتمددت بسريرها من التعب والإرهاق بعد ما قامت سوت العشا ونظفت الصاله وجهزت ملابس المدرسه وتذكرت أن عليها حفظ قصيدة لأحمد شوقي وواجب لمادة الإنجليزي ما حلته ومابقى فيها حيل المسكينه فتحت كتاب اللغة الانجليزية وجلست تحل الواجب والساعه دقت 12 منتصف الليل تأخر مبارك وينه ماجى شمعه تكلم نفسها بعدين تذكرت أوه صح اليوم دور بدريه قالت أحسن برتاح من شوفته اليوم وبنام ومن أقوم لصلاة الفجر بحفظ القصيدة وغطت شمعه بنوم عميق من التعب
وفي صباح اليوم الثاني مبارك يركب سيارته ومعاه شمعه يوصلها بطريقة للمدرسه
مبارك : لو تتركي عنك هاي المدرسه وتفكي راسك من صدعة الكتب والمدرسين وتجابلي بيتك أحسن
شمعه: أعتقد في بينا شرط ولازم تنفذه وهاي المدرسه اللي ماعجبتنك هيه بتسوي لي قيمة لما أحصل الشهاده وقت نشتغل
مبارك : والله كلام وايد عندكم أم الثقافه مقطعه نفسها
شمعه: بعدين تعال قولي أي بيت تقصد أجابله بيت فيه أمك وزوجتك وأنا مثل الخدامه فيه تقولي بيتي
مبارك : أيوه بيتك وبعدين أمي هيه الكل بالكل فالبيت وطلباتها أوامر وأبشرك بدريه بتنتقل تسكن مسقط
شمعه: تنتقل بدريه مسقط عز الله أنفردت فيني عمتي بشغل البيت والله حرام عليكم والله حرام
مبارك:تركي المدرسه وجابلي البيت أحسنلك
ونزلت شمعه من السياره لتدخل المدرسه وقالت وهيه نازله أحسب حسابك اليوم أنا بكون بيت أمي تعال بعد العشا شلني من بيت أهلي ؛ خلصت جملتها ودخلت المدرسه
سلطان وهو اللحين رجال متقاعد وخذله بفلوس التقاعد باص لينقل فيه طلاب المدارس ويشغل نفسه
اللحين دخل البيت وجلس بالصاله وينادي: يا رقيه وينج؟
رقيه تطلع من غرفتها: أيوه أنا هنيه شوفيك تنادي؟
سلطان: تعالي نتريق
رقيه: هذا الريوق جدامك
سلطان: ما أعرف أكل بروحي أبيك عدالي
رقيه تجلس : والله إنك عيار وقت تبا تاكل بروحك بتاكل
سلطان يضحك :بس الأكل معاج غير وين مريوم؟
رقيه: وين يعني أكيد نايمه
سلطان: هاي البنت من خلصت الدراسه لا تبي تشتغل ولا تبي تكمل دراستها
رقيه: براحتها شغل البيت مايرد حد نافعتني بالغسيل والخمام
سلطان : زين زين أنا بخلص أكل بسير أرقد شوي قبل أذان الظهر وصحيني عشان أصلي وأروح المدرسه أنتظر خروج الطلاب
رقيه: إن شاء الله ولا يهمك
وبعد نهاية يوم دراسي رجعت شمعه بيت أهلها وحصلت أمها بالمطبخ وسلمت عليها
رقية: ما شاء الله أشوفج اليوم زايرتنا
شمعه: اشتقتلكم وقلت بجي اتغدا عندكم وخبرت مبارك
رقيه: وين هوه زوجك راح؟
شمعه : لا ماهو اللي وصلني السايق اللي وصلني هو بيمر علي بليل عشان يرجعني البيت
رقية: أها بس زين بعد شوي بيجهز الغدا
شمعه:بروح أبدل ملابسي وين مريوم؟
رقيه: بغصب قومتها من رقادها عشان تغسل الملابس اللي بسلة الملابس
شمعه: كسوله هاي البنيه أعرفها عدل بروح ابدل وبجي أساعدك
مشت شمعه لحد باب المطبخ حست بدنيا الدور وتمسكت بباب المطبخ ركضت صوبها رقيه تسالها: شوفيج يابنتي
شمعه:ماعرف أحس من فتره أدوار براسي وتعب وإرهاق
رقيه : شكلك ما تاكلي عدل وماتنامي كفايه بسبب هاي العيوز أم مبارك
شمعه تكمل مشيها ولكن هالمره طاحت بالحوش فقدت الوعي

يتبع…