السمٌٓاح

الشاعر ساعد ساعد _ أدرار الجزائر

يا مفتاح الهدى يالماحي خاتم الارسالي
يا ڨلاع الدهشة والغبينة يوم التمحان
صلوا عنو يا سامعين من جانا بالقرآن
غابت سعاد أصاحبي وخلات المرسم خالي
واش يصبر من كيف حالتي عاشق وولهان
رحلت سعاد وكيف ما تزيد جراحي وعلالي
ما دام رضيت انا طلاقها نصبر لوهان
كانت لباس العز والفخر اللي بيه نشالي
كانت ڨنطاس الدار كانت تنكد العديان
يبست هذا الجنة بعدما كانت ڨاع دوالي
نبكي ماشي غرضي علها تطفى ذا النيران
هذا القوم الطغاة مايعرفوشي حق العالي
وطلقنا سعاد يا جماعة كونو فطان
نا ما بيا سعاد زينها والخلخال يشالي
ولا بي اسمها نا اخترتو بين النسوان
يا كعب بن زهير جبت سعاد كسرت غلالي
وسعادي من لا يعرفها ما عندوشي شان
يا رسول الله يا شفيع فاللي عصاة بحالي
ماني راضي بالذل ولاني راضي لك تنهان
يتزعزع هذا الكون كان يتفجر ما بدخالي
لكن كلام الحق في وقتنا ماليه مكان
الظالم صار أويلنا معلم والسارق والي
والعلما غبروا بقى ليهم حتى شان
يا محمد بوفاطمة طبيب جراحي وعلالي
حاشاك يجي خسيس قومهم ينكر البرهان
الدين رجع غريب بينا ـ يا فكاك وحالي ـ
ونوضوا بالتنديد كل واحد فينا غضبان
ونوضوا بالتنديد كاملة ما فيناشي تالي
ونشجبوا بالكلام في فعلهم وشي ماكان
السن بالسن العين بالعين فعلك بافعالي
والبادي أظلم شي من الصبر يردك جبان
نساو الغزالة اللي نصفها والغصن الدالي
والطائف داعهم ما لقاش فعقلي نسيان
رب المستضعفين يا لله وعليك اتكالي
نيشن بيهم ياخالقي معايا شور الجنان
خير ربي نبيه كيف تبغي: نطبق جبالي
ولا نخسف أرضي قاع ويرجعوا قصة كان
جاوب: اغفر ليهم يالله قومي لعقل خالي
جهالة ياربي لا تحافيهم ذا الطغيان كان الأمين
نساو بينهم صادق في الافعالي
من قبل الرسالة كان شمس تضوي الاكوان
صلى الله عليك يالماحي خاتم الارسالي
ياقلاع الدهشة والغبينة يوم التمحان
صلوا عنوا يا حاضرين من جانا بالقرآن
الر حمة يا رحمن يوم تكثر نوبات اهوالي
واغفر لينا إذا ما نكونوا طعم الديدان
واهدينا يا ربي طريقنا من لمصايب خالي
واغفر لي يا خالقي ذنوبي جاه العدنان
واغفر لما وابا وخالتي واعمامي واخوالي
واللي حاضر واللي داخلين صفوف الإيمان
سميتي بوجمعة اللا معرف باسم الجيلالي
من قصر بني وازل زيد لي بودة فالعنوان
ولاية أدرار يالباعث لاتنساها لي
جزايرنا وردة ما حلاها زينة لوطان
اللهم صلي على الماحي خاتم الارسالي
بيه ڨليع الدهشة والغبينة يوم التمحان
بجاه المصطفى لليمنة رجح لي مكيالي
أنا والمسلمين نسكنوا في جنة رضوان
صلوا عنوا يا سامعين من جانا بالقرآن

 

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى