مصباح الظلام
الشاعر الجزائري معمر رزق الله
تحية تقدير لكل إمام
ونباركلو في يوم عيدو
عيد وطني مالعام للعام
نفرحو مع إمامنا ونزيدو
ياك هو مصباح الظلام
تلقاه ديما باذل مجهودو
يفسر في كتاب العلام
كل وقت وافي ميعادو
صلاة ودروس ف الأمام
ينور فالعقول ما يتعدو
قرٱن وأحاديث خير الآنام
وأقوال العلماء اللي عدو
ومذاهب وكلها قال كلام
وڨداه ناس منو استفادوا
الصلوات الخمس والقيام
جمعةواعياد ثابت وجودو
يوصي ع الفقراء والأيتام
ويحفز ذوك اللي يجودو
يصلح بين الناس مالخصام
ويسعى للخير ولو وحدو
تسيبر المسجد صعب المهام
ومهما كان الحال ما يبعدو
شهر رمضان عبادة وصيام
منور المسجد حتى نعيدو
دورو فالمجتمع دور هام
إحترام وتقدير لازم حدو
ومهام اخرى في ذا المقام
والعمل الديني ماكاش ندو
ربي يطول عمرك ياإمام
ويجعلك مصباح به نهتدو
ويقوي بيك شوگة الإسلام
ويرحم ذاك لي سكن لحدو
