تبي تعرف وش المقصود ؟؟

بقلم:قاسم الغريبي

تبي تعرف وش المقصود ؟؟

نشف ريقي وأنا ألمّح
مضى عمري وانا أشرح
يا هيه أفهمني وصحصح
وتبي تعرف وش المقصود

ترى واضح وش المقصود

تضحي ؟ ركز وأصحى
ومن فينا اللي ما ضحى
تبيها شعبي أو فصحى
تحن الناس للمفقود

أظن واضح وش المقصود

بدونك قلبي ما يقوى
وانت المنّ والسلوى
وترى هالكون ما يسوى
إذا ضيعت في الموجود

كذا تفهم وش المقصود؟

غرامك فرحة سنيني
وحبك بس في عيني
وقربك لي يسليني
وانت مكبله بقيود

ترى هذا هو المقصود

أبي الباقي من الأيام
نطير بشوق فوق هيام
ونصحى بحبنا وننام
كذا نعشق بدون حدود

فهمت الحين بالمقصود

اذا حبيت تفهمني
دخيلك صدق علمني
ولا تقسى وتظلمني
ولا تسأل عن المقصود

لأنك تعرف المقصود