بقلم الشاعر مرزوق عوض الدرك
كنا وكان، لا قلت ولا قال،
وكأن ما شقيت وشبع مني الزمان.
كبرتهم على كتافي، وحسبتهم رجال،
والرجولة مش صورة، ولا كل دكر راجل.
وأدينا صابرين على الحال،
واثقين في الخالق يصلح الشأن.
والصبر محتاج طويل البال،و أقول يارب، تطوّل حبال الروح، شربت المر ألوان.
كل يوم الهم يزيد جرح،
ولا قلت كلمة، ولا سألت سؤال.
ويا فايدة الكلام مع الغشيم؟
لو الحديت في ودانه أذان.
عايش في دنيا غير دنيته وكله كدب،
واللي اتعود على الكدب عمره ما له أمان.
ولما حسيت بالغدر عاتبني الوقت وقال،
اديتك فرص كتير ليه سلّمت للأندال؟
طول الليل مربوط مع الأفكار بحبال،
والجسم نحيل وما عادت الرجل تشيل نحال.
قلت أنا أخف من ريش النعام،
مش تقيل، وبيا المطرح مليان.
يا ترى تحسوا بيا لما يفضى عليكم المكان،
و لا الخلق تقول المرحوم، ما وراهوش جدعان.
ويوم الرحيل مش محتاج دموع تسيل،
يا اللي ما بكيت يوم على شقاي زمان.
واللي يستقوى على والديه، مصيره يقف قدام الديان.
يا ولدي خاف من فعل زمانك، وما تمشيش في طريق العميان.
الزرع بيكبر، والحصاد قرب،
فوق من غفلتك يا جبان.
دستوا على القلب، وما عملتوا، حساب جرح يدمي تحت القدم.
ولا عملتوا خاطر للشيب، ولا عرفتوا يوم الندم.
عيشتوني أعد النجوم في النهار، وأحسبه ليل،
وشبت قبل الأوان، وزرعتوا الشيبة في الطين.
وانطلق القلم وكتب، لما حس بالوجع والأحزان،
قلت سيبه يمكن أرتاح،و قولت مش ندمان .
كلامي و كتبته في الورق أشعار،
أبص فيه، وما ينطقوش اللسان.
خايف أبوح بيه وأقول آه، يشوفه عزول،
ويقول خسارة السبع لما يرقد في الفراش عيان.
كتير رقصت القلم بأشعار الغزل في كل جميل،
وشلته فوق الشال، وصعدت بيه درج الكتمان.
وحبيت العزوة، ولمّيت العيال،
لما غلبتني بكتر الخلف النسوان.
ولولا ما كنتش زرعت زرع صغار،
كنت سبت الجمل بما حمل، و هجرت الأوطان.
لينا أحباب عايشة في بلاد أغراب،
تعبت من الفراق، وشبعت حرمان.
وفضلت متمسك ببشر،
عليه هنت، وعليا ما هان.
وفي آخر العمر، ما ليش غير رب كريم،
عليه اتوكل، ومن رحمته أطلب الأمان..
إن كان الزمان قسى، فربك ما يظلمش،
واللي يصبر على وجعه، يومًا يلاقي بعد العسر إحسان.
كنا وكان، والدنيا ادوار،
واللي يزرع خير، يحصد خير مهما طال الزمان.
