يالله بشمس
✍ حسن القحل :
ياالله لاضاقت فمنك التفاريج
يسر اموري واقضلي كل حاجه
حبيت اخذ جولةٍ لي وتعريج
واشعل بيوت الشعر واضوي سراجه
ماقل دل وكثرت الحكي تهريج
والشي لا من زاد يصبح سماجه
هذا الزمن ضاعت علوم ومناهيج
ما عاد نميز صقرها من الدجاجه
الكل يركض والبشر قامت تتديج
وكل معا شقرا بيسرج سراجه
صار الفرح في الناس كذبه وترويج
والكل منهم دوم عاقد حجاجه
ما عاد به ضحكه ولا به مباهيج
هذي ضرايب ذا الزمان ونتاجه
من غير تحريض ومن دون تاجيج
وكل على ماقيل يعرف خراجه
إحذر مساليك الخطر والمداريج
واحفظ لسانك وإنتبه لعوجاجه
الما يعرف حين فتح الصهاريج
يعرف زلال الما ويعرف هماجه
إفهم دروبك مدخلك والمخاريج
من قبل لا تمشي بدرب وفجاجه
يالله بشمس تعيد فينا المباهيج
ونشوف ضوا إشراقها وانبلاجه
