شاب الراس
الشاعر الشعبي عبد الحفيظ كسالي
شاب الراس من المحاين ياولفي
ملي جانا ذالبلا ماشفنا خير
ريح الغربي صاط وعجاج يسفي
ذاق الحال عجزالسان على تعبير
بسم الله بديت مبداها حرفي
يافاهم لقصايصي هاك التدبير
مهما ڨلت كلام عنها مايكفي
هاذ الوقت لي العاقل فيه احير
ذالسر المكتوم في قلبي مخفي
يالسرمن كيفي واحل في ڨاع البير
من يقرا لحروف ويقدر وصفي
يفهم للمقصود هاذا أمر خطير
ياحصراه يام عادت بالخلفي
ذالدونية حالها ما هوش بخير
ياخوتي مابقات بنا في عرفي
لاحشمة لا دين لالقدر لكبير
ذاك الوقت زين كي راح مڨفي
ذالجيل المنحوس تلفله واش يدير
كي عاد الخو علي خيه منفي
من بعد لي كان عنده خيرالعشير
صفيها لڨلوب يارب وشفي
تجبر ليناحوالنا في وقت ڨصير
