✍️ سمير الشحيمي :
الكل متواجد على طاولة افطار الصباح قال صقر : ها يعيال كيف كان أسبوعكم.
حسناء : أنا امتحاناتي الاسبوع الجاي.
صقر : ربي يوفقك حبيبتي.
شاهين : تعرف تحضير سنه اولى كليه.
شيهانه : نفس نظامك.
صقر : راح تاخذون صيفي ولا بتكملون بعد إجازة الصيفيه؟
شاهين : أنا بكمل صيفي بس شيهانه لها خطط ثانيه هيه وباشق.
صقر : شو خططكم ؟
باشق: كنت أفكر هاي السنه من بعد امتحانات حسناء نسير خريف صلاله اسبوعين زمان.
شيهانه : هيه والله أبويه فخاطرنا نسير صلاله.
صقر : ماعرف شو اقول لكم بس كان ببالي نفس الشي.
حسناء : صج بتودينا صلاله؟
سلمى : هيه ياعيال البارحه ابوكم من جى من العاصمه وقالي هاي السنه بنسير صلاله بالخريف.
باشق : احلى خبر.
شاهين : برايكم انتوا روحوا أنا بجلس أخذ صيفي.
شيهانه : برايك أجلس مالازم تسير وناسه بقوم أخبر نادره راح تستانس اكيد أنه بنتلاقى بصلاله.
شاهين : راح تسير نادره صلاله؟
شيهانه : ايوه بتسير مع أهلها.
شاهين : الصيفي متعب احسن اسير اغير جو معاكم بصلاله ملحق على الدراسه.
باشق : غيرت رأيك سبحان الله.
شاهين : خلك بحالك.
صقر يضحك وقال : عالعموم قوموا نجهز لصلاة الجمعة.
العصر
حسناء تعطي علب ورق عنب لشاهين يوصلهن لزبائن وقالت له : توصلهن كل علبه وعليها اسم اللي بيستلمها.
شاهين : واللوكيشن؟
حسناء : برسلك اللحين على تلفونك.
شاهين : ومبلغ التوصيل.
حسناء : اوف منك امسك هاي فلوس بترولك.
شاهين : كذيه متفاهمين اللحين بوصلهن.
حسناء : اللحين شاهين عشان الطلبيه ماتخرب.
شاهين : اوك.
يخرج شاهين إلى سيارته طلعت شيهانه وهيه متلبسه وقالت : وين شاهين ؟
حسناء : راح يوصل طلبيات ورق عنب.
شيهانه : من راح يوصلني بيت نادره؟
سلمى سمعتها وقالت : انا بوصلك بس اخلص شغلي بالمطبخ.
شيهانه : راح تتأخري وانا مستعجله يا امي.
سمعهم صقر وقال : على وين رايحه؟
شيهانه : بيت زميلتي نادره لمت بنات الكليه.
صقر : أنا بوصلك لحضه أجيب مفتاح سيارتي.
شيهانه: ابوي حبيبي المنقذ.
سلمى : أبوي المنقذ ها!؟
شيهانه : مالنا غنى عنك يا حلوة اللبن.
سلمى: أيوه مدحيني اللحين.
صقر : يالله سرينا.
جيم رياضي للرجال
باشق يتمرن على جهاز المشي ويتحدث بالتلفون مع جيهان : تعرفي شو أحلى شي أنه بنتلاقى بصلاله.
جيهان بصوت حزين : بالفعل كان بيكون شي حلو واستثنائي.
باشق : كان؟ شو يعني كان ماراح تروحين صلاله هاي السنه؟
جيهان : للأسف أبوي ماوافق.
باشق يوقف رياضة المشي : كيف وليش ما وافق على أساس متعودين كل سنه تروحون صلاله ليش هاي المره لا.
جيهان : ماعرف كلمته بس أبوي قال هاي السنه ماشي روحه صلاله.
باشق : لا حول وأنا جلست أقنع إخواني وأهلي بغصب عشان يودونى صلاله وأكون متواجد حواليك.
جيهان : شو راح نسوي هذا الشي اللي حصل لا تضايق نفسك.
باشق : كيف ما اضايق نفسي جيهان وأنا متأمل أكون معاك بصلاله خلاص بهون عن السفره.
جيهان تضحك بكل قوتها ويسمعها باشق مستغرب وقال : شوفيك تضحكين جنيتي؟
جيهان مستمره بالضحك وقالت : اوف لو تسمع صوتك وحزنك ياخي انت تحفه.
باشق : شو قصدك؟
جيهان : كنت امزح معاك راح انكون بصلاله هاي السنه بس قلت أسوي معاك دراما خفيفه.
باشق : سود الله وجهك تسوي فيني مقلب الله يسامحك.
جيهان : حبيت امقلبك خفيف بشوف معزتي بقلبك.
باشق : لا والله وشو حسيتي؟
جيهان بصوت هادئ : يلوموني فيك إذا حبيتك يالقلب الحنون.
باشق يبتسم.
العاصمة
رحمه في شقتها وحواليها ابنائها الصغار وقفت أمامها الخدامه: مدام خلاص شغل يريد شي ثاني؟
رحمه : أيوه شلي الصغاريه غرفتهم عشان ينامون وانتي روحي ارتاحي.
الخدامه تأخذ الأطفال وتذهب بهم إلى غرفتهم.
رحمه : هذا من رجع بيته ماتصل ولا سأل وين تلفوني.
تمسك تلفونها وترسل مسج وات ساب لصقر لكن لم يستلم تتصل على جهازه يرد المجيب الآلي ( الهاتف الذي طلبته مغلق أو خارج نطاق الخدمة حالياً يرجى الاتصال فيما بعد ).
أغلقت رحمه الخط بعصبيه قائله: لما يكون موجود معاي جهازه شغال على طول بس يوصل عند حرمته يغلق جهازه انا بعرف كيف اتصرف معاك هين.
يتبع….
