مسك الليل
الشاعر علي جدايني المرزوڨي / الجزائر
كانك شاعر ڨول كلمة ساوية
ومتن فالضربة تهز الساس
نزيدك واطلق نارك وين تلحڨ حامية
قوية كاللي حطها قناص
غدر كاسك من عراف الدالية
ولا تعصرو مالورڨ ينداس
خمر واطلق من كنانك قافية
تعطر بين مجالسك لنفاس
تتغنى بيها الناس الزاهية
و للعشاق تبرد التهواس
و تعزى بيها العين الباكية
و تداوا بيها ضرار الباس
كان هجيت اختار كلمة كافية
و صوم على ذ الغالية ترخاس
لا تهدى لقلوب عنك جافية
و مد الوردة لوح يد الفاس
عند كبير الشان كونك زاوية
وعطر فمك بالحديث قياس
و بين صغار القوم ترجع ساڨية
و لا تتكبر حط ذاك الراس
خلي ( أنا ) زيد فالحسبة مية
كثر منك وشحال من تراس
فاتتهم ليام تسبڨ جارية
بقات الحكمة في هواهم ساس
هذي كان بغيت حكمة شافية
تضويلك ليام بعد دماس
وادعيلي بلخير بعد العافية
و لجميع اللي ماقطع لياس
مرزوڨي نيران ڨلبي ڨادية
شد الحكمة ديرها قنباس
تلحق وين بغيت في ذ الفانية
وترجع تحت ترابها عساس
