نحبك و انتي سبب افراحي
الشاعر محمد رحال - تبسة / الجزائر
نحبك و انتي سبب افراحي
يا مرجاحي
ماحي الڨلب لوين تميحي
ڨاسي ڨلبك. ماشو واحي
بكثر اجراحي
منك يا طم تڨرويحي
نحبك ساكن حبّك ڨلبي
روفي بربي
زاد عذابك علي غلبي
طول الليل ڨعدت نجبّي
سهرت ب غبّي
تاعب دونك شكون لي يلبيّ
سباب بلايا عيونك تسبي
خلّلت مسبي
طاح تكبكب واش يخبّي
كيف يطيح فطيم يحبي
يدبي و يكبي
وينو ٲمو شكون تلّبـــي
امولات العيون الهذبي
روفي ب طلبي
ديري مزية جيني جبّي
و ٳنتي حبي حبيبة ڨلبي
هواكي طاحي
سكن تمكن و زاد نواحي
نحبك و انتي سبب افراحي
يا مرجاحي
ماحي الڨلب لوين تميحي
ڨاسي ڨلبك. ماشو واحي
بكثر اجراحي
منك يا طم تڨرويحي
