شــــــــــــــــــوف
الشاعرة نعيمة نقري _ الجزائر
شوف ..
زعافك أنا ما نقدرلوش
مرايتي تتكسر
زيني يتأثر
وخطوط بهايا
يولو ما يبانوش
شوف
لما تزعف مني أنا
يا أنا
أنا نتأثر
أنا نتغير
أنا نتبعثر
أنا نتودر
ويخرج من داخل عماقي خوف
شوف
الزين الي فيا حبيتو
فجأة بزعافك خبيتو
و من خوف زعافك
لوني تبدل
لوني تحول
وبنت قدام رياحك صوف
شوف
كي تنزعف نت
أنا نهزل
ورد خدودي
يبدى يذبل
الكلمة في حلقي
تنشف .. تيبس
و الشفة فالشفة
تفشل .. تيأس
وجهي يبدى تالف مخطوف
شوف
هذا لمَا مني تزعف
كلش فيايبدى يرجف
ويجي وجهك
وسط الرسمة
يرجع لوني ثم ظلمة
ويبدى غراب النحس يطوف
شوف
ونتمنى يفارق غيم زعافك
لحظة وحدة من تنهادك
يهدى ريحك
يهدى ريحي
ويتفاجى فيا غيم سمايا
ونتبعثر في سماك حروف
شوف
حروف الحب الي منقوعة
في ما روحي بيه مرفوعة
بروج المعنى بشعر معطر
باسمي آنا
وباسمي آنا
قصايد تكبر
وتقراهالي بصوت الخوف
شوف
خايف نهجر حضنك خايف ؟
ونخلي ذكرى من حضني ؟
وبعد زعافك تفطن زاهي
ومع الفطنة تفيق اتغني
وتصيب مكاني محذوف
شوف
لمن بالميز راح تغني ؟
وعودك لحن اوتارو مني
ونت قلت نتيا وطني
وبكفانو أنا ملفوف
شوف
لما تزعف وتعاديني
وتبطل لحظة تسقيني
وطنك يشهد فيك الغدرة
وتولي خاين مكشوف
شوف
لحظات تعاديني آنا
نتبلع حبس او محبوس
وقصة علونها في جلسة
مفتوحة وبدون جلوس
وعين كبيرة
كبيرة شابة
عين اتخلقت ابلا شوف
شوف
لحظات تعاديني آنا
نولي جرح بلا مولاه
جرج عميق السم املاه
جرح عميق يسيل بدمو
ودمو يسنو بيه سيوف
شوف
لحظات تعاديني آنا
نولي ساقي ما في صحرة
ماه كمل وزادت صحرة
ونشف جسمو باه يطوف ؟
شوف
لحظات تعاديني آنا
نولي طريق
طريق بعيدة
وسط الناس ونحس وحيدة
او وسط طريقي
او وسط الوحدة
أنحس ابعمري مقصوف
شوف
يلا ما تكذب او تبغيني
وتحب ازيد تعاديني
عاديني ونتايا راقد
وصوتك فيا
فيا خالد
وبزيني صباحك موصوف
شوف
شوف فيا ونت ساكت
كي تعاديني قول عليا
قول عليا راها ماتت
ورواح ادفني ياضري
وبخرني وبخرلي قبري
بإيه وآه وآي و أوف
ونا نسمع ونت تشوف
شوف ..
