يا سرع الأيام..
شعر
حسن بن قاسم قحل
مرت سنين العمر ياسرع الأيام
كنا شباب أمس واليوم شبنا
طغت علينا هموم وأحزان والآم
وابليس والدنيا خذتنا ونشبنا
عاث الزمن فينا وحن نطرد أحلام
ومن كثر ما نركض وراها تعبنا
أكبر غبن وأكبر حسافه وتندام
إنا تبعنا الوهم حتى سرقنا
راحت ليالي العمر منا والأعوام
من دون ما نفطن لها ولاحسبنا
نطرد ورى الدنيا بلا قيد وخطام
والحيل منا انهد وخارت قدمنا
والشيب لاح وزاد في العمر الأرقام
ياللاسف راح العمر وش كسبنا
غشيم من هوا يحسب الفوز قدام
الفوز والله لا ركعنا وسجدنا
يالله أنا طالبك يارب الأنسام
تغفر خطايانا وذنب ارتكبنا
يا مالك الرحمه رجا كل منظام
فيك الأمل يالله ومن الذنب تبنا
وصلاة ربي عداد ما هبة أنسام
على شفيع الخلق من نسل عدنا
محمد المبعوث والصحب الأعلام
وبالآخرة يا الله تعلي رتبنا
……
