تقدير الرجال
……….
بديت (بالرحمن) ذكر ن وتهليل
إللي خَلقَ سبعِ ن وخلَّق أنامه
يتلاه تسليم وصلاة وتبجيل
على شفيع الخلق يبلغ تمامه
محمد ن من حاز قدر ن وتفضيل
ومن جاء بالآيات يجلي العتامه
قال …
القحل بالله إسمعوا دون تأويل
وتفطنوا يا أهل العقل والفهامه
نظمت لي بعض الصور والتحاليل
فيها نبين كل شخص ونظامه
من غير تقصير ن ومد ن وتطويل
وفيها علوم أهل الجهل والغشامه
حسب اللذي شفنا ونقل المراسيل
وحسب اللذي نسمع ونفهم مرامه
مكارم الاخلاق خير المحاصيل
ينشئ عليها الشخص حزة فطامه
وين الرجال إللي تحل الحلاحيل
الحل في شوره ومنطق كلامه
الفرق ما بين الرجال المشاكيل
فرق الثريا عن خمام القمامه
ما أفقر الرجال كثر المداهيل
ولا كثرت مال الخسيس الرخامه
ياحي مجلس به دلال ومعاميل
مشرع ن للظيف يلقى إهتمامه
ولا بارك الله مجلس بلا قناديل
مقفول طول العام دايم ظلامه
يا جعل من يكرم مقام الرجاجيل
يحيا رفيع الراس مرفرع هامه
وعسى دروبه كل أبوها تساهيل
ويعيش بين الناس عالي مقامه
ويا جعل منهوا يستهن بالرجاجيل
يحيا ذليل ولا يلاقي كرامه
ويبلاه ربي با الخزي والغرابيل
ويعيش عمره في الردا والملامه
عمر الكرم ما كان في ذبحة الحيل
ولا قعود ن بارك ن مع سنامه
كرامة الوافين بشر وتهاليل
وترحيبة بالظيف تسبق سلامه
فيها البشاشه والفرح والتعاليل
ومقابلة أهل الوفا بابتسامه
تنزل بقلب الظيف مزن وهماليل
تغني المظيف عن كلافة طعامه
يكسب بفعله كل قدر ن وتجليل
ويعد من أهل الكرم والشهامة
ولا مات راعي الطيب تبقى التفاصيل
مقرونة ن بإسمه ليوم القيامه
يتناقلوه الخلق جيل ن بعد جيل
والكل يثني على الإسم في كلامه
ويخسى ويعقب إسم راعي الأباطيل
يلقى بها بين الرجال إحترامه
وإن مات ماله ذكر حي ن وتاصيل
وكل ن نساه ولا على مثله ندامه
………….
شعر
حسن بن قاسم القحل
