لا يغرك مظهر الشخص وثيابه
وغترةٍ وعقال فوق الراس رزة
الزمن هذا ماعد نعرف غُرابه
من الصقر والحنديه وبطة ووزة
كل شي بعيوننا صار يتشابه
حتى رز بوكاس ومهيدب ومزة
ما يفرق بينهم غير الكتابه
وإسم من برا على الخيشه نقزة
والخيش متشابهات ولا غرابه
كلها أكياس مشكوكه بغرزة
مثل بعض الناس ما عد يندرابة
هو صويلح ولا صالح ولا حمزة
كل شي مغشوش وملعوب بحسابه
الوضع مخبوص ومن الصعب فرزة
حتى عاقلنا غدا فاقد صوابه
ووضعه متقلب بكل حزة وحزة
وكل واحد عالق بهمٍ سرابه
حتى بعض أحيان من نومه يفزة
واعتقد هذا الزمن ما به.. ذيابه
ما به إلا… ناقه.. وثورٍ… وعنزة
فإنتقي من بين أصحاب وقرابه
شخص واضح مخبره صادق تعزة
وإحترس من شخص متغطي بثيابه
وجوهره تعبان أدنى شي هزة
والصلاة على النبي وآله وصحابه
ختم أحرف صغتها لك من معزة
